Qazaqstan jastary «Óz elińdi tany» ekspedıtsııasyna attandy
QR Aqparat jáne qoǵamdyq damý mınıstrligi «Rýhanı jańǵyrý» baǵdarlamasyn iske asyrý aıasynda el halqynyń ortaq qundylyqtaryn shoǵyrlandyrýǵa baǵyttalǵan «Qazaqtaný» jobasyn iske asyrýda.
«Men Jambyl oblysy, Talas aýdany, Oıyq aýylynda dúnıege keldim. Bala kezimde aǵash satyny jerge qoıyp, avtobýs sııaqty etip oınaıtynmyn. 1981 jyly shyqqan álemdik kartany alyp, tańǵy saǵat 9:00-den keshki saǵat 19:00-ge deıin Vladıvostoktan Máskeýge deıin oısha saıahat jasap qaıtatynmyn. Aǵash saty – avtobýsqa tańerteń otyryp, kartada aldymnan kezdesken aýyl-aımaqtarǵa «baryp», eldi meken ataýlaryn jattap alatynmyn», - dedi búgin ekspedıtsııaǵa arnalyp elordadaǵy Oqýshylar saraıynda ótken shara barysynda bloger Órken Kenjebek.
«Qazaqtaný» jobasynyń basty maqsaty – jastardy qazaq halqynyń qundylyqtaryn, ásirese tuńǵıyq tarıhyn nasıhattaýǵa, dáripteýge keńinen tartý.
«Shyny kerek, ol kezde álemdi aralap shyǵý múmkin ekeni týraly oılamaıtynbyz. Qoldan kelgeni sol – aǵash satyǵa otyryp alyp, oısha saıahattap kelý. Mine, Alla buıyrtyp, keıingi 7 jylda álemniń 37 memleketinde boldym. Bir jarym apta buryn Portýgalııada, onyń aldynda Vetnamǵa saparladym. Endi aldaǵy senbi kúni Shrı-Lankaǵa baramyn. Ol men barǵan 38-memleket bolmaq», - deıdi ol.
Sondaı-aq, Órken Kenjebek qoǵamda qalyptasyp qalǵan kóptegen steorotıpter týraly aıtty.
«Nege adam saıahattaýy kerek dep oılaısyzdar? Aldymen, adam óziniń kim ekenin moıyndaýy kerek. Men jaı ǵana aýyldan shyqqan balamyn. Ózimniń nadan ekenimdi moıyndaǵan adammyn. Men – aqymaqpyn. Meniń bul álem týraly bilimim óte az. Maǵan kitap ta, ınternet te jetkiliksiz. Men úshin álemdi tanýdyń tóte joly – saıahat. Álemdi aralaǵanda kóptegen stereotıpterdiń durys emes ekendigine kózim jetti. Álemdegi barlyq jamandyq sol elde shoǵyrlanǵan bolyp kórinetin – Aýǵanstan men úshin – álemdegi eń qonaqjaı el. Sol sııaqty Qazaqstannyń ishki jaǵdaıy týraly da aıtýǵa bolady. Sizder ártúrli aımaqtan kelip otyrsyzdar. Bul – tamasha bastama», - deıdi ol.
Aıta ketý kerek, ekspedıtsııaǵa Qazaqstan halqy Assambleıasy jastar qanattarynyń, «Jańǵyrý joly» RJQ-nyń músheleri, stýdentter men jas mamandar, monoqalalar men aýylda turatyn jastar qatysady.