Qazaqstan jastary qolynan keler isti álemge tanytýy kerek - JOO stýdenti

TALDYQORǴAN. QazAqparat -Táýelsiz eldiń urpaqtary Prezıdenttiń salıqaly saıasatyn júzege asyrý arqyly jastardyń qolynan ne keletinin dúnıejúzine tanytýymyz kerek. Mundaı pikirdi І. Jansúgirov atyndaǵy Jetisý memlekettik ýnıversıtetiniń ekinshi kýrs stýdenti Dıdar Jumahan bildirdi, dep habarlaıdy QazAqparat.

«Astanada ótken «Táýelsizdik urpaqtary» atty Jastar jylynyń resmı ashylý saltanatyn І. Jansúgirov atyndaǵy Jetisý memlekettik ýnıversıtetiniń pedagogtary men stýdentteri tikeleı efır arqyly tamashaladyq. Alǵashqy kezekte el kóleminde tanymal, bilimdi, isker, óz kásibin júrgizip otyrǵan jastar sóz aldy. Olardyń jas ta bolsa atqaryp jatqan úlken isterimen tanysyp, qanattana tústik.​ Al Elbasynyń sózi boıymyzǵa jiger berip, patrıottyq sezimimizdi ushtady. Qazaqstannyń bolashaǵyn qalaıtyn azamattar ekendigimizdi taǵy bir márte tereń sezinýimizge múmkindik ashty. Elbasy bıylǵy jyldy Jastar jyly dep jarııalaýy teginnen emes. Bul, bizge berilgen úlken múmkindik. Biz - táýelsiz eldiń urpaǵy Prezıdenttiń salıqaly saıasatyn júzege asyrý arqyly jastardyń qolynan ne keletinin dúnıejúzine tanytýymyz kerek», - deıdi ol.

Quqyq jáne ekonomıka fakýlteti stýdentiniń aıtýynsha, jastar qoldan keler isti sózben emes, ispen dáleldeýi qajet. Osy oraıda ol birneshe joba ázirlegen.

«Olar óz mamandyǵym boıynsha jáne odan da tys bastamalar. Sonyń biri - Almaty oblysynyń jastary arasynda debat klýbyn uıymdastyrý, ekinshisi - ekotýrızmdi qalyptastyrý. Elbasy búgingi jastarǵa qarata aıtqan sózinde de elimizdiń kórikti jerleriniń bárin aralaǵanyn, ásirese Almaty oblysynda maqtan tutarlyq jerler kóptigin atap ótti. Bizde Sharyn shatqaly, Altynemel syndy ózgelerge maqtanyshpen kórsetetin tabıǵı baılyǵymyz jeterlik. Sony qoljetimdi etip týrızmdi damyta bilsek, elimizdiń abyroıy budan beter arta túsedi dep oılaımyn. Sondaı-aq, Elbasy «Aqyl jastan, asyl tastan» deı kele jastardy sapaly bilim alyp, ǵylymdy damytýǵa, órkenıet kóshinen qalmaı ýaqyt talabyna saı adymdaýǵa shaqyrdy. Jas ǵalymdardy qoldaý maqsatynda bólinetin grant kólemin eki ese arttyrýdy tapsyrdy. Bul bizge úlken serpin berdi», - dep túıdi óz oıyn JOO stýdenti.

Eske salaıyq, 23 qańtar kúni Astanada Nursultan Nazarbaevtyń qatysýymen Jastar jylynyń saltanatty ashylý rásimi ótti.

Aıta ketsek, Prezıdent Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn. Arada bir aıdan astam ýaqyt ótkennen keıin Elbasy Jarlyǵymen 2019 jyl Jastar jyly bolyp resmı túrde jarııalandy.