Qazaqstan jastary grepplıngten álem chempıonatynda jalpykomandalyq esepte 1-oryn aldy

ASTANA. QazAqparat - Grepplıngten Qazaqstan jastar quramasy Ispanııada ótken álem chempıonatynda birinshi jalpykomandalyq orynǵa ıe boldy, dep habarlaıdy QazAqparat.

12 qazanda Pontevedra qalasynda (Ispanııa) erler, áıelder, kadetter men jasóspirimder arasynda grepplıngten álem chempıonaty bastaldy.

Jarysqa álemniń 24 elinen 300-den astam sportshy qatysýda.

Chempıonat baǵdarlamasyn kadetter (16-17 jas) men jasóspirimder (18-20) ashty, jarys qorytyndysy boıynsha bizdiń qurama jalpy (medaldyq) esepte birinshi oryndy ıelendi.

Qazaq sportshylary Ispanııa, Ýkraına, Izraıl, Qyrǵyzstan jáne Frantsııa quramalaryn artta qaldyryp, 26 altyn, 21 kúmis jáne 13 qola medal jeńip aldy.

Aıta ketý kerek, bizdiń komanda eki jas sanatynda (kadetter men jasóspirimder) eki bólimde (No Gi jáne Gi) birinshi oryn alyp, jetistikke jetti.

Ótken jyly tek kadetter (16-17 jas) birinshi oryndy qanaǵat tutqan.

Aıta keteıik, 14-15 qazanda erler men áıelder jarysady.

Eske sala keteıik, dál osy sportshylar jarysqa ushyp bara jatqanda Mılan áýejaıynda qalyp qoıǵan bolatyn. Olar grepplıngten álem chempıonatynda Qazaqstan namysyn qorǵaýǵa bara jatqan.

Keıin Mádenıet jáne sport mınıstrligi jastardyń aman-esen Ispanııaǵa jetkenin, jarysqa qatysyp jatqanyn aıtty.