Qazaqstan jastary AQSh-taǵy zamandastarymen baılanys ornatady
Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte aıtyldy. QR Aqparat jáne qoǵamdyq damý mınıstrligi Jastar jáne otbasy komıtetiniń tóraǵasy Madııar Qojahmet bıyl Jastar jyly aıasynda atqarylyp jatqan sharalarǵa toqtaldy.
«Jastar jylyn jemisti ótkizý úshin 5 negizgi baǵyt boıynsha jumys istep jatyrmyz. Sonyń ishindegi eń negizgi baǵyt – baspanamen qamtý. Jyl saıyn Nur-Sultan, Almaty, Shymkent qalalarynda 3 myń arendalyq páter berý jobasynyń erejesi bekitilýde. Al «Jas kásipker» jobasy «Atameken» ulttyq kásipkerler palatasynyń qoldaýymen jeńil nesıeler berýdi kózdeıdi. «Jas maman» jobasy boıynsha 180 kolledj ben kásibı-tehnıkalyq oqý ornynyń materıaldyq tehnıkalyq bazasy jańartylyp jatyr. Azamattyq belsendilikti damytý baǵyty boıynsha úkimettik emes uıymdarǵa arnalǵan 50-den astam grantqa konkýrs jarııaladyq. Olardyń ishindegi eń ózekti degenderi Volonterlar jyly aıasynda uıymdastyrylady. Erikti qozǵalystardy yntalandyrý úshin keleshekte volonterlar jumysyna saǵatyna 1 myń teńge qosymsha aqsha tólenetin bolady», - dedi mınıstrlik ókili.
«Bolashaq» qaýymdastyǵynyń atqarýshy dırektory Laýra Demesinovanyń aıtýynsha, Jastar jylynda elimizdiń túkpir-túkpirindegi jastar uıymdarynyń ózara baılanysyn damytýǵa basa mán berilmek. Sol úshin netvorkıng jáne jastar uıymdarynyń tájirıbe almasýy jobasy júzege aspaq. Elimizde birinshe ret ótkeli otyrǵan shara 13 tamyzdan 4 qyrkúıekke deıin jalǵasady. 17 óńirdiń jastary Nur-Sultan, Almaty, Shymkent, Pavlodar, Oral qalalarynda bas qosyp, tájirıbe almasatyn bolady.
«Joba shamamen 1100 adamdy qamtıdy degen esep bar. Eldiń barlyq óńirin qamtıtyn aýqymda shara bolǵandyqtan 100 mln teńgeden astam qarajat bólinip otyr. Eń qýanyshtysy, bıyl jastardyń belsendi ómirine eńbek jastary kóptep tartylmaq. Oǵan «Samuryq-Qazyna» Ulttyq ál-aýqat qory qoldaý kórsetýge daıyn. Jobanyń ekinshi kezeńinde AQSh jastarymen baılanys ornatý kózdelgen. Bizdiń jastar AQSh-taǵy jastar uıymdarynyń jumys tájirıbesimen tanysatyn bolady. Jobanyń qorytyndysy retinde úzdik tájirıbeler jınaǵyn shyǵaramyz», - dedi Laýra Demesinova.
Netvokıng jáne jastardyń tájirıbe almasý jobasyna ótinish qabyldaý osy aptanyń juma kúnine deıin jalǵasady. Oǵan jastar uıymdary, úkimettik emes jastar uıymdary jáne jastar resýrstyq ortalyqtary qatysa alady.