Qazaqstan jastar quramasynyń bapkeri shákirtiniń «Valıadolıdke» qalaı aýysqanyn aıtty

<p>ASTANA. KAZINFORM &mdash; Qazaqstandyq fýtbolshy Muhammed Eńsebaevtyń ıspanııalyq &laquo;Valıadolıd&raquo; klýbyna aýysýy el fýtbolyndaǵy eleýli oqıǵalardyń biri boldy. Kazinform agenttiginiń tilshisi osy oraıda Qazaqstan U-19 jastar quramasynyń jattyqtyrýshysy Aleksandr Kýznetsovqa habarlasyp, az-kem áńgimelesti.&nbsp;</p>

– Byltyr jeltoqsan aıynda men Ispanııa memleketinde taǵylymdamadan óttim. Sonymen qatar ol jaqta jas fýtbolshylarymyzdy ıspanııalyq klýbtarǵa qabyldaý konkýrsyn uıymdastyrýǵa qatystym. Bul qazaqstandyq jas jetkinshekter úshin ózin kórsetýge keremet múmkindik deýge bolady. 7 oıynshymyz qaralymnan ótti. Olarǵa bul úlken tájirıbe boldy. Sol joly Muhammed ózin jaqsy qyrynan kórsetip, «Valıadolıd» sapynda qalatyn boldy. Osy ýaqyt aralyǵynda kelisimshart pen onyń vızasyna qatysty protsess júrip jatty», - deıdi bas bapker Aleksandr Kýznetsov.

Belgili mamannyń aıtýynsha, Eńsebaev tyńǵylyqty daıyndalyp, ózin jaqsy jaǵynan kórsete bilgen. Nátıjesinde, ol ıspanııalyq klýbpen úsh jylǵa kelisimshartqa otyrdy.

– Árıne, qıyn boldy, biraq bul jerde Muhammedtiń alǵa jyljyp, joǵary deńgeıde oınaýǵa degen umtylysy sheshýshi ról atqardy. Men bul jigitti burynnan tanımyn, RKS mektep-ınternatynda birge jumys istedim. Keıin «Jas Qyranǵa» shaqyryp, jastar quramasyna ákeldim. Onyń tehnıkasy men eńbekqorlyǵyn atap ótkim keledi. Muhammed árqashan doppen erkin júredi jáne únemi óz betimen jeke jumys isteıdi, sheberligin shyńdaıdy. Bári óziniń qarym-qabiletine baılanysty boldy. Onyń alǵa basýyna tilektespin jáne oǵan senemin, - dedi Qazaqstan quramasynyń bapkeri.