ShYMKENT. KAZINFORM – Shymkent qalasyndaǵy Beeline Arena ulttyq tennıs ortalyǵynda 16 jasqa deıingiler arasynda ótip jatqan Devıs kýbogy Azııa – Tynyq muhıt aımaǵy boıynsha irikteý týrnırinde Qazaqstan jasóspirimder quramasy jeńiske jetti.
Shırek fınalda Sergeı Kvaktyń shákirtteri álemdegi úzdik quramalardyń biri, jasóspirimder arasynda Devıs kýbogynyń alty dúrkin chempıony Aýstralııa quramasyn 2:0 esebimen tize búktirdi.
Kemeron Bertondy 6:3, 6:0 esebimen utqan Damır Jalǵasbaı Qazaqstanǵa birinshi upaıdy áperdi. Sodan keıin Zańǵar Nurlanuly «Úlken dýlyǵa» týrnıriniń eki dúrkin jeńimpazy Lleıton Hıýıttyń uly – Krýz Hıýıtty tas-talqan etip jeńdi – 6:1, 6:0.
Ótken jyly da shırek fınalda qazaqstandyqtar Aýstralııany 2:0 esebimen qapy qaldyrǵan edi. Osylaısha, Qazaqstan jasóspirimder quramasy aldaǵy kúzde 16 jasqa deıingiler arasynda Devıs kýbogynyń fınaldyq kezeńinde ekinshi jyl qatarynan baq synaıdy.
Erteń, 24 mamyr kúni qazaqstandyqtar jartylaı fınalda Koreıa nemese Gonkong quramasymen kezdesedi.
Eske sala keteıik, budan buryn Qazaqstan jasóspirimder quramasynyń Qytaıdy jeńgenin jazǵan bolatynbyz. Sondaı-aq Rolan Garros týrnırinde Mıhaıl Kýkýshkın irikteý jarysynyń fınalyna ótti.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).