Qazaqstan jarylǵysh zattardy zalalsyzdandyrý boıynsha EQYU-nyń oqý kýrsyn ótkizýde

ASTANA. QazAqparat - Qazaqstan Respýblıkasynyń halyqaralyq mindettemelerdi oryndaýy aıasynda QR Qorǵanys mınıstrliginiń ókilderi Almaty jáne Arys qalalarynda «úsh qosý» deńgeıindegi jarylǵysh zattardy zalalsyzdandyrý boıynsha ekinshi óńirlik tájirıbelik-oqytý kýrsyn ótkizýde. Bul týraly vedomstvonyń baspasóz qyzmetinen málim etti.

Kýrstar 16 qazannan bastap «Otar» 40-shy áskerı bazasynyń oq-dárilerdi qaıta óńdeý pýnktinde ótýde. Ol 30 qazanǵa deıin jalǵasady.  

Jarylǵysh zattardy zalalsyzdandyrýdyń (JZZ) oqytý baǵdarlamasy halyqaralyq standarttarǵa sáıkes EQYU-ǵa qatysýshy Ortalyq Azııa men Aýǵanstandaǵy múddeli elder úshin JZZ operatsııalary aýqymynda ulttyq potentsıaldy arttyrýǵa baǵyttalǵan. Bul kýrs Armenııa, Qazaqstan, Qyrǵyzstan, Tájikstan, Ózbekstannyń áskerı mamandaryna arnalǵan. Oǵan EQYU-ǵa qatysýshy elderden 45-ten astam ókil qatysýda.

Sarapshy retinde AQSh-tyń (USRCENT), Ulybrıtanııanyń, Serbııa men Slovenııanyń Gýmanıtarlyq mınasyzdandyrý ortalyǵynyń mamandary shaqyryldy.

Kýrstyń teorııalyq bólimi «Beıbitshilik maqsattaǵy seriktestik» (QAZTsENT) oqý-jattyǵý ortalyǵynyń bazasynda, al praktıkalyq sabaqtar «Otar» 40-nshy áskerı bazasynyń oq-dárilerdi qaıta óńdeý pýnktinde ótýde. Semınar barysynda jarylǵysh zattardyń táýekelin qysqartý jáne olarǵa den qoıý máseleleri qarastyrylyp, jarylǵysh zarttardy zalalsyzdandyrý máseleleri boıynsha aqparat pen tájirıbe almasý kózdeledi. Budan ózge, semınardyń taqyryby boıynsha Qazaqstannyń ulttyq tájirıbesi týraly QR Qorǵanys mınıstrliginiń jáne basqa da memlekettik organdardyń ókilderi semınardyń ashylý kezinde sóz sóıledi.