Qazaqstan Japonııaǵa taýarlar eksportyn keńeıtýge múddeli

<p><strong>QR Saýda jáne ıntegratsııa mınıstri Arman Shaqqalıev Ekonomıka, saýda jáne ónerkásip vıtse-mınıstri Resýke Kodzýkı bastaǵan Japonııadan kelgen delegatsııamen kezdesý ótkizdi. <a href="Kazinform." target="_blank" rel="noopener">Kazinform</a> bul týraly Saýda jáne ıntegratsııa <a href="https://www.gov.kz/memleket/entities/mti/press/news/details/685694?lang=kk" target="_blank" rel="noopener">mınıstrligine</a> silteme jasap habarlaıdy.&nbsp;</strong></p>

Taraptar saýda-ekonomıkalyq yntymaqtastyqtyń ózekti máseleleri men perspektıvalaryn, onyń ishinde ekijaqty saýdany ulǵaıtý múmkindikterin talqylady. 

Arman Shaqqalıev atap ótkendeı, Japonııa Qazaqstandaǵy iri ınvestorlardyń ondyǵyna kiredi. Sońǵy 17 jylda japondyq ınvestıtsııa kólemi 7,8 mıllıard dollardan asty. 

2023 jyldyń 11 aıynyń qorytyndysy boıynsha ózara taýar aınalymy ótken jyldyń sáıkes kezeńimen salystyrǵanda 16,5%-ǵa ulǵaıyp, 2 mlrd dollarǵa jetti. 

«Biz qazaqstandyq ónimderdiń eksportyn keńeıtý áleýetin kórip otyrmyz jáne 204 mıllıon dollarǵa 45 óńdelgen taýardy jetkizýdi odan ári arttyrýǵa daıynbyz. Qazaqstanda iri aýyl sharýashylyǵy jáne azyq-túlik habyna aınalý úshin barlyq resýrs bar. Aýyl sharýashylyǵy ónimderin, ásirese, jylqy etin jetkizýde úlken múmkindikter bar», - dedi QR saýda jáne ıntegratsııa mınıstri. 

Saýda-ekonomıkalyq ózara qarym-qatynastardyń ósýi men nyǵaıýy úshin Arman Shaqqalıev qazaqstandyq «KazakhExport» pen Japonııanyń eksporttyq-kredıttik agenttigi arasynda saqtandyrý, qaıta saqtandyrý jáne nesıelerge kepildik berý salasynda tyǵyz yntymaqtastyq ornatýdy usyndy.

Kezdesýde taraptar Osaka qalasynda 2025 jyldyń 13 sáýir men 13 qazan aılar aralyǵynda ótetin «Bizdiń ómirimiz úshin bolashaq qoǵamyn qurý» taqyrybyndaǵy EKSPO 2025 kórmesine daıyndyq máselesin kóterdi.

Qazaqstan Respýblıkasy Saýda jáne ıntegratsııa mınıstriniń aıtýynsha, Qazaqstannyń halyqaralyq kórmege qatysýy eki eldiń múddeli kompanııalary men isker toptary arasynda uzaq merzimdi jáne ózara tıimdi baılanystardy ornatýǵa yqpal etedi.

Óz kezeginde Japonııanyń Ekonomıka, saýda jáne ónerkásip vıtse-mınıstri Resýke Kodzýkı elderimiz arasyndaǵy iskerlik qarym-qatynastardyń odan ári jandandyrýǵa senim bildirdi, sondaı-aq aldaǵy kórmege sapaly daıyndyqty qamtamasyz etý maqsatynda Qazaqstanǵa kómek kórsetýge ýáde berdi.