Qazaqstan janýarlarǵa arnalǵan vaktsına ımportynan tolyq arylmaq

NUR-SULTAN. QazAqparat – Qazaqstan janýarlar vaktsınasyn ázirleýdi jolǵa qoıyp, ımporttan tolyq arylýdy josparlap otyr, dep habarlaıdy QazAqparat tilshisi.

«Biz biryńǵaı operator quryp, otandyq óndirýshilerge vaktsına jasaý úshin memlekettik tapsyrys bergimiz keledi. Eger otandyq óndirýshiler memlekettik tapsyrys aıasynda qajetti kólemde vaktsına ázirleı alsa, olar Ýkraına, Reseı jáne Belarýs elinen keletin dári-dármekti almastyrady. Bolashaqta ımportqa táýeldi bolmas úshin «QazBioPharm» holdıngti qyzmeti aıasynda otandyq vaktsına óndirisin jolǵa qoıǵymyz keledi. «QazBioPharm» halyqaralyq standarttarǵa sáıkes vaktsına shyǵarady», - dedi QR Aýyl sharýashylyǵy mınıstriniń orynbasary Rústem Qurmanov Ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń málimdeýinshe, memlekettik tapsyrys boıynsha janýarlarǵa arnalǵan vaktsınanyń 70 paıyzy otandyq ónim, qalǵan 30 paıyzy Belarýs jáne Reseıden satyp alynady.

«Eýropadan jetkiziletin vaktsınalarǵa qatysty qymbattaýshylyq bar. Onyń sebebi dollar, eýro baǵamynyń ósýine baılanysty bolýy múmkin. Bizde janýarlarǵa arnalǵan vaktsına ákeletin kóptegen kásiporyn bar. Biraq olar ákeletin vaktsına kólemi azaıdy. Azaıýdyń sebebi ımportqa tyıym salýda emes, baǵamen baılanysty bolyp otyr», - deıdi ol.

Buǵan deıin habarlaǵanymyzdaı elimizde veterınarııa salasyn reformalaýdyń jol kartasy bekitildi.