Qazaqstan janar-jaǵarmaı ımportyna salynǵan tyıymdy uzartty

NUR-SULTAN. QazAqparat - Qazaqstan janar-jaǵarmaı materıaldarynyń ımportyna salynǵan tyıymdy uzartyp otyr. Bul shara – ýaqytsha ári 2020 jylǵy 1 qyrkúıekke deıin kúshinde bolady, dep habarlaıdy QazAqparat tilshisi QR Energetıka mınıstrliginiń baspasóz qyzmetine silteme jasap.

««Reseı Federatsııasynan Qazaqstan Respýblıkasyna munaı ónimderin jetkizýdiń keıbir máseleleri týraly» QR Energetıka mınıstriniń osy jyldyń 27 naýryzyndaǵy buıryǵyn ýaqtyly bekitý - óndiriletin jáne tutynylatyn munaı ónimderiniń kólemi arasyndaǵy yńǵaıly teńgerimdi qamtamasyz etýge múmkindik berdi. Sonymen qatar búgingi tańda ishki naryqtaǵy munaı ónimderiniń qorlary edáýir joǵary deńgeıde», - dep habarlaıdy mınıstrlikten.

Qosymsha ımporttyq otyn kólemi túsetin bolsa, bul otandyq munaı óńdeýge keri áser etýi múmkin. Atap aıtqanda:

- qazaqstandyq MÓZ-den munaı ónimderin tıep-jóneltý kólemin tómendetýi yqtımal;

- zaýyttyq rezervýarlyq parkterdiń, sondaı-aq eldegi barlyq munaı saqtaý bazalarynyń tolyp ketýine ákeledi;

- sonyń saldarynan, munaı óńdeýdi májbúrli túrde tómendetýge ákep soǵady. Bul dızel jáne avıatsııalyq otyn sııaqty munaı ónimderiniń basqa da baǵaly túrlerin óndirýdi tómendetýge alyp keledi.

«Elimizdiń energetıkalyq qaýipsizdigin qamtamasyz etý úshin Energetıka mınıstrligi Qazaqstan Respýblıkasyna temirjol, avtomobıl jáne qubyrjol kóligimen benzın, avıatsııalyq jáne dızel otynyn ákelýge tyıym salýdy engizýde. Bul shara ýaqytsha ekenin, ári 2020 jylǵy 1 qyrkúıekke deıin qoldanylatynyn atap ótken jón», - dep qaıtalady mınıstrlikten.