«Qazaqstan-jańa Jibek joly» jobacy 2050 jylǵa qaraı elden júk tasymaldaý kólemin ondaǵan esege arttyrady - N.Nazarbaev
Búgin Astanadaǵy «Qazaqstan» kınokontsert zalynda ótip jatqan Azııa damý banki Basqarýshylar keńesiniń 47-shi jyl saıynǵy otyrysynda Elbasy Nursultan Nazarbaev osylaı málim etti.
Qazaqstan Orta Azııadaǵy órkenıetti naryqtardń biri bolýymen qatar bul óńirdegi negizgi lokomotıvterdiń birine aınalatyndyǵyn basa aıtqan QR Prezıdenti: «Batys Qytaı - Batys Eýropa» kólik dálizin salý «Qazaqstan-jańa Jibek joly» syndy úlken jobanyń bir bóligi bolyp sanalady. Ol 2050 jylǵa qaraı el aýmaǵynan júk tasymaldaý kólemin ondaǵan esege arttyratyn bolady. Bul mega joba kez kelgen júkti kóliktiń kez kelgen túrimen Qazaqstan aýmaǵy arqyly belgilengen jerge aparýǵa múmkindik beretin arna qalyptastyratyn zamanaýı kóliktik logıstıkalyq jelini qurýdy kózdeıdi», - dedi.
QR Prezıdentiniń atap ótýinshe, Qytaıdan Kaspıı teńizine deıingi aralyqty qamtıtyn uzaqtyǵy 1500 shaqyrymdyq jańa temir jol jelisi qurylysy kelesi jyly tolyǵymen aııaqtalatyn bolady. Bul dáliz Túrkimenstan arqyly Iran, Parsy shyǵanaǵyna shyǵýǵa múmkindik beredi. Al bul bir kezderi bolǵan Jibek jolyn qaıta jańǵyrtý bolyp tabylady.
«Kóne Jibek jolyn qaıta jańǵyrtý onyń boıynda ornalasqan barlyq elder úshin ekonomıkalyq-áleýmettik damýǵa járdemdesip, saıası turaqtylyq ornatady. Sońǵy nátıjede progreske, gúldenýge, beıbitshilikke qol jetkiziledi», - dedi N.Nazarbaev.