Qazaqstan jańa saıası mádenıetti engizýdiń jańa modeline kóshedi – QR Prezıdenti
Bul týraly Memleket basshysy Qasym-Jomart Toqaev Konstıtýtsııaǵa ózgerister men tolyqtyrýlar engizý jónindegi keńes otyrysynda aıtty, dep habarlaıdy QazAqparat.
«Shyn máninde, bul Qazaqstannyń bılik ınstıtýttaryn qalyptastyrýdyń jáne yqpaldastyqtyń, jańa saıası mádenıetti engizýdiń múlde jańa modeline kóshkenin bildiredi. Naqty ári tolyq túsinik bolý úshin osy model men úderisti Ekinshi respýblıka retinde belgiledim. Jańa paradıgmaǵa sáıkes Prezıdenttiń ókilettigi qysqarady, Parlament pen máslıhattardyń róli aıtarlyqtaı kúsheıedi. Azamattardyń qatysýy edáýir artyp, quqyq qorǵaý salasy júıeli túrde nyǵaıady», – dedi Qasym-Jomart Toqaev.
Sondaı-aq Prezıdent Konstıtýtsııaǵa ózgeris Joldaýda aıtylǵan saıası bastamalardy júzege asyrý úshin kerek ekenin aıtty.
«Jumys toby qajetti túzetýlerdi ázirledi. Bul iske belgili zańger ǵalymdar, adam quqyqtary jónindegi ýákil, Parlament jáne memlekettik organdardyń ókilderi atsalysty. Konstıtýtsııalyq Sotta, Konstıtýtsııalyq Keńeste jumys istegen ǵalymdarymyz bar. Ata zańymyzdyń jańa normalaryn ázirlegende olardyń mol tájirıbesi septigin tıgizgeni anyq. Ásirese, Konstıtýtsııalyq Sotty qurý jáne onyń jumys tártibin retteý máselesi týraly oı-tujyrymdar paıdaly boldy, – dedi Prezıdent.
Jıynǵa Parlament Senatynyń tóraǵasy Máýlen Áshimbaev, Parlament Májilisiniń tóraǵasy Erlan Qoshanov, Memlekettik hatshy Erlan Qarın, Prezıdent Ákimshiliginiń Basshysy Murat Nurtileý, Ádilet mınıstri Qanat Mýsın jáne Jumys tobynyń músheleri qatysty.