Qazaqstan zańnamasy Kaspıı konventsııanyń erejelerine sáıkestenderiledi

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine Kaspıı teńizinde qyzmetti júzege asyrýǵa baılanysty máseleler boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasynyń negizgi maqsaty - Kaspıı teńiziniń quqyqtyq mártebesi týraly konventsııanyń erejelerin Qazaqstan Respýblıkasynyń birqatar zańnamalyq aktilerine engizý.

«2018 jylǵy 12 tamyzda besinshi Kaspıı sammıti barysynda qol qoıylǵan Kaspıı teńiziniń quqyqtyq mártebesi týraly konventsııany Qazaqstan 2019 jylǵy 8 aqpanda ratıfıkatsııalady. Konventsııa quqyqtyq retteýdi qajet etetin árbir másele boıynsha tabandy ári qaǵıdatty pikir-talastarmen qosa, 20 jyldan astam ýaqyt alǵan uzaq jáne kúrdeli kelissózder úderisiniń nátıjesi boldy. Kaspıı jaǵalaýy memleketteri akvatorııany ártúrli rejımge, aýmaqtarǵa, ishki sýlarǵa, eni 15 teńiz mıli bolatyn aýmaqtyq sýlarǵa, 10 mıldik balyq aýlaý jáne ortaq teńiz keńistigine bólý týraly konsensýsqa qol jetkizdi», - dedi QR Syrtqy ister mınıstri Muhtar Tileýberdi.

Onyń aıtýynsha, Qazaqstan zańnamasyn konventsııanyń erejelerine sáıkestenderý maqsatynda atalǵan zań jobasy ázirlendi.

Zań jobasynda «balyq aýlaý aımaǵy», «balyq aýlaý aımaǵynyń rejımi» degen uǵymdar engizilip otyr, sondaı-aq balyq aýlaý aımaǵynda sý bıologııalyq resýrstaryna kásipshilik júrgizýge Qazaqstan Respýblıkasynyń aıryqsha quqyqtarynyń saqtalýyn baqylaý jónindegi memlekettik organdardyń quzyreti jáne olardyń ózara is-qımyl jasaý tártibi bekitiledi.

Konventsııanyń erejelerin eskere otyryp, qoldanystaǵy «aýmaqtyq sýlar eniniń esebi úshin bastapqy syzyq», «aýmaqtyq sýlar», «Qazaqstan Respýblıkasynyń shekaralyq keńistigi» degen uǵymdarǵa ózgerister engizilýde.