Qazaqstan zamanaýı gaz óńdeý ónerkásibin qurady

<p>ASTANA. KAZINFORM - Qazaqstan Premer-Mınıstri Oljas Bektenovtiń tóraǵalyǵymen Energetıka mınıstrligi jáne &laquo;QazMunaıGaz&raquo;, QazaqGaz, &laquo;Samuryq-Energo&raquo;, KEGOC, &laquo;Samuryq-Qazyna&raquo; UÁQ kompanııalary basshylyǵynyń qatysýymen Energetıkalyq keńes otyrysy ótti.</p>

Kún tártibinde Qazaqstan Respýblıkasynyń Prezıdenti Qasym-Jomart Toqaev pen Qatar memleketiniń Ámiri sheıh Támım ben Hamad Ál Tánı arasynda bıylǵy aqpan aıynda qol jetkizilgen ýaǵdalastyqtardyń oryndalýyn baqylaý máselesi qaraldy, dep habarlaıdy Úkimettiń baspasóz qyzmeti.

«QazaqGaz» UK» AQ basqarma tóraǵasy Sanjar Jarkeshov birlesken gaz jobalaryn iske asyrý barysy týraly baıandady. Qatardyń UCC Holding kompanııasymen birge qýaty jylyna 1 mlrd m3 jáne 2,5 mlrd m3 bolatyn eki gaz óńdeý zaýyty, jańa KS-14 kompressorlyq stansasy jáne «KS-14-Qostanaı-Aqtóbe» magıstraldy gaz qubyry, sondaı-aq «Beıneý-Bozoı-Shymkent» MGQ ekinshi jelisi salynady.

GÓZ qurylysy óńdeý qýatyn arttyrý arqyly shıki gazdy tıimdi paıdalanýǵa baǵyttalǵan. «Beıneý-Bozoı-Shymkent» magıstraldy gaz qubyrynyń ekinshi jelisin salý ońtústik, ortalyq jáne soltústik óńirlerdi gazben jabdyqtaýdyń, sondaı-aq eksport kólemin saqtaýdyń arqasynda Qazaqstannyń energetıkalyq qaýipsizdigin qamtamasyz etedi.

Jańa kompressorlyq stansa men «Aqtóbe-Qostanaı» magıstraldy gaz qubyryn iske qosý Qostanaı oblysynyń halqy men óńirdiń ónerkásip kásiporyndaryn kógildir otynmen qamtamasyz etýge múmkindik beredi.

Jıynǵa qatysýshylar mámileniń negizgi sharttaryn bekitti. QazaqGaz jáne UCC Holding jalpy mańyzdy tórt joba boıynsha ortaq kelisimge kelgeni atap ótildi. Aldaǵy ýaqytta olardy birlesip júzege asyrý jumystary bastalady.

Premer-Mınıstr jobalardy iske asyrý kezinde QazaqGaz ulttyq kompanııasy tobynyń ishki quzyretterin jáne otandyq óndirýshilerdiń ónimderin barynsha paıdalanýdy tapsyrdy. Sonymen qatar Energetıka mınıstrligine gaz salasynyń tabystylyǵyn ári qaraı arttyrý jóninde tapsyrmalar berildi.

«Qazaqstan Prezıdenti men Qatar Ámiri arasyndaǵy ýaǵdalastyqtar elimizdiń ekonomıkasy úshin asa mańyzy bar birqatar mega-jobalardy birlesip iske asyrýǵa múmkindik beredi. Biz Qazaqstanda zamanaýı qýatty gaz ónerkásibin qurý jolynda ornyqty túrde alǵa jyljyp kelemiz. Jobalardy iske asyrýda eshqandaı irkilister bolmaýy kerek. Barlyq másele meniń jeke baqylaýymda», — dep atap ótti Oljas Bektenov.