Qazaqstan World Of Journalism Study kartasyna enedi

NUR-SULTAN. QazAqparat - Ál-Farabı atyndaǵy Qazaq ulttyq ýnıversıteti jýrnalıstıka fakýlteti ǵalymdary ǵalamdyq zertteýler júrgizý tobyna qosyldy, dep habarlaıdy QazAqparat ýnıversıtettiń resmı saıtyna silteme jasap.

Búkilálemdik jýrnalıstıka zertteýleri - Worlds of Journalism Study Association (WJS) 2010 jyly qurylǵan álemdegi jýrnalıstıkanyń ahýalyn turaqty baǵalaıtyn akademııalyq joba. Lıýdvıg-Maksımılıan Mıýnhens ýnıversıtetiniń professory Tomas Hanıchtyń úılestirýimen ǵalamdyq zertteý toby búginde 110 eldiń jýrnalıstıka akademııalyq oshaqtaryn basyn biriktirgen.

Álemdik QS top-ýnıversıtetterdiń medıa jáne kommýnıkatsııa zertteýleri reıtıngisiniń kóshbasshy kafedralary jetekshiligimen Afrıka, Azııa, Ortalyq jáne Shyǵys Eýropa, Latyn Amerıkasy jáne Karıb araldary, Taıaý Shyǵys jáne Soltústik Afrıka, Batys Eýropa, Soltústik Amerıka, Avstralııa jáne Jańa Zelandııa elderiniń ulttyq naryǵyn zertteýdi bastady.

Zertteýdiń basty maqsaty – jýrnalıster, reporterlarǵa jumys babynda qoıylatyn sharttar, shekteýlerge qatysty kásibı kózqarastary, dúnıetanymyndaǵy ózgeristerdi jaqsy túsinýde, sondaı-aq álemdegi pandemııa jaǵdaıynda jýrnalıstıkanyń áleýmettik fýnktsııasyn aıqyndaý sanalady.

Assotsıatsııanyń Jarǵysynda atalǵandaı, basty mindeti ǵylymı zertteýlerdi qoldaý men álemdegi jýrnalıstıkanyń jaı-kúıin baǵalaý. WJS seriktesteri retinde ıÝNESKO, Jýrnalısterdiń halyqaralyq federatsııasy, Shekarasyz reporterler, Jýrnalıster daıarlaýdyń Eýropalyq assotsıatsııasy sııaqty beldi uıymdar bar.

Alǵashqy pılottyq zertteýler 2007-2011 jyldardy qamtysa, kelesi tolqyny 2012 – 2016 jyldardyń arasynda júrgizildi. Zertteýlerge alǵashynda álemniń 67 elinen ǵalymdar qatysyp, ulttyq deńgeılerde jýrnalıstıka keısterin baǵalasa, ekinshi kezeńinde jalpy metodologııalyq bazalyq zertteýlerge 27 500 jýrnalıst qatysqan. Worlds of Journalism zertteýleri jýrnalısterdiń qyzmettik mindetterin oryndaýdaǵy jańashyl tásilderi, olardyń qoǵam men úkimet arasyndaǵy qarym-qatynasy, sondaı-aq jumysynyń sıpaty men mánin baǵalaýdan turady.

2020-2022 jyldardy qamtıtyn WJS úshinshi tolqyn zertteýlerine 110 eldiń ishinen Qazaqstan ǵalymdary alǵash qatysýda. Qazir respýblıka boıynsha 2500 jýrnalısti qamtıtyn boljamdy respondentter bazasy ázirlenip jatyr. Ál-Farabı atyndaǵy QazUÝ ǵalymdary WJS aıasynda zertteýler júrgizýge daıyn. Bul elimizde jýrnalıstıkanyń ulttyq ereksheligin jahandyq deńgeıde tanytýǵa jańa jol ashady.