Qazaqstan vızasyz elder tizimin 82-ge deıin keńeıtti

<p>Qazaqstandyq pasporttyń mártebesin arttyrý jumysy belsendi júrgizilip jatyr. Bul týraly QR Syrtqy ister mınıstrliginiń resmı ókili Aıbek Smadııarov jyldyń qorytyndy brıfınginde baıandady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Onyń aıtýynsha, 2023 jyly vızasyz elder tizimi túrli sanattaǵy pasporttar boıynsha 82 memleketke deıin keńeıtildi, sonyń ishinde 29 memleket ulttyq pasporttar boıynsha keńeıtildi.

Pasporttardyń túrli sanattary boıynsha 3 jańa elmen ózara vızasyz rejım týraly kelisimder jasaldy, olar: Bangladesh (dıplomatııalyq jáne qyzmettik pasporttar boıynsha), Seıshel Araldary jáne San-Marıno (pasporttardyń barlyq túrleri boıynsha).

«Sonymen qatar bıyl Qytaı jáne Vetnammen ulttyq pasport ıelerine vızalyq talaptardan bosatý týraly kelisimderge qol qoıyldy. Ózderińiz biletindeı, QHR-men vızasyz rejım kúshine endi. Vetnammen vızasyz rejım jaqyn arada taraptar barlyq qajetti memleketishilik rásimderdi aıaqtaǵan soń bastalady», - dep túsindirdi A. Smadııarov.

Sondaı-aq qazaqstandyq azamattar úshin Eýropa odaǵymen vızalyq rejımin jeńildetý máseleleri boıynsha resmı konsýltatsııalardy bastaý týraly ýaǵdalastyqqa qol jetti.

QR azamattary úshin eýropalyq vıza rejımin jeńildetýdiń birinshi kezeńderi retinde: vızalyq alymdy tómendetý; ótinimderdi qaraý merzimderin qysqartý; kópmárteli vızalardyń qoldanylý merzimin uzartý máselesi qarastyrylyp jatyr. 

Buǵan deıin Aıbek Smadııarov Túrkııadaǵy tabıǵı apattar men Taıaý Shyǵystaǵy áskerı-saıası qaqtyǵystyń shıelenisýinen 400-den astam qazaqstandyq otbasy múshelerimen evakýatsııalanǵanyn aıtqan edi.