Qazaqstan vaktsınalar boıynsha kómekke muqtaj emes – AQSh Memlekettik hatshysynyń kómekshisi
«Biz koronavırýs, Qazaqstannyń Pfizer vaktsınasyn satyp alýy jáne vaktsına boıynsha kómek kórsetý máseleleri boıynsha yntymaqtastyqqa qatysty birqatar kelissóz júrgizdik. Sondaı-aq, biz QazVac otandyq vaktsınasyn ázirleý salasyndaǵy yntymaqtastyqty, COVID-19 naýqastaryn emdeýdegi tehnıkalyq konsýltatsııalar úshin jabdyqtar usyný máselelerin talqyladyq. Pandemııa aıasynda seriktestigimiz kúsheıedi dep oılaımyn», - dedi Donald Lý QR Syrtqy ister mınıstrliginde jýrnalıster suraǵyna bergen jaýabynda.
Onyń aıtýynsha, qazir Aq úı vaktsınalar boıynsha kómek kórsetý máselelerin qarastyryp jatyr.
«Meniń oıymsha, Qazaqstan vaktsınalar boıynsha kómekke muqtaj emes. Sizder óz vaktsınalaryńyzdy óndirip jatyrsyzdar. Biraq AQSh-qa saparlaý úshin engizilgen jańa shekteýlerden keıin búkil álemde naqty bir vaktsınalarǵa qajettilik bar dep oılaımyn. Múmkindiginshe, sizderge kómekteser edik», - deıdi Donald Lý.
Sondaı-aq, D. Lý Amerıka Qurama Shtattaryna kirý týraly suraqqa jaýap berdi.
«Barsha álemde AQSh-qa barǵysy keletinder úshin bul qıynyraq ekenin bilemin. Qazir biz DDSU-da tirkelgen jáne AQSh-ta maquldanǵan vaktsınalardy alǵandardy qabyldaımyz. Mınıstrdiń orynbasarymen sóıleskende, Qazaqstan QazVac vaktsınasyn DDSU-da bekitý úshin kóp jumys istep jatqanyn bildik. Qazir AQSh-qa kirý úshin Pfizer, Moderna, Johnson & Johnson vaktsınalarynyń tolyq tsıklyn, al basqa vaktsınalar boıynsha eki dozany nemese bir tolyq dozany alý kerek», - dep túsindirdi Donald Lý.
Aıta keteıik, búgin QR Syrtqy ister mınıstriniń orynbasary Aqan Rahmetýllın men AQSh Memlekettik hatshysynyń kómekshisi Donald Lýdyń tóraǵalyǵymen Qazaqstan men AQSh arasyndaǵy Keńeıtilgen strategııalyq áriptestik jónindegi komıssııa otyrysy ótti.