«Qazaqstan úshin qaýipti usynys» - respýblıkalyq basylymdarǵa sholý

ASTANA. 28 jeltoqsan. QazAqparat - Qazaq aqparat agenttigi respýblıkalyq basylymdarda 28 jeltoqsan, sársenbi kúni shyqqan ózekti materıaldarǵa sholýdy usynady.

***

Keshe Memlekettik hatshy Qanat Saýdabaev WBA tujy­ry­my boıynsha kásipqoı bokstan orta salmaqtaǵy álem chem­pıo­ny Gennadıı Golovkınge «Parasat» ordenin tabys etti. Kezdesýde boksshy elimiz Tá­ýelsizdiginiń 20 jyldyǵynda memleket tarapynan orden al­ǵa­nyna razylyǵyn bildirip, bul marapat ózi sııaqty elimizden syrtqary jerlerde, el namysyn qorǵap júrgen sańlaqtarymyz úshin aýyzben aıtyp jetkizgisiz úl­ken qýanysh ekenin, osy nag­ra­dany ol maqtan tutyp, elimizdiń kók baıraǵyn bıikte jelbiretý úshin aıanbaı ter tógetinin atap ótti. Bul týraly «Egemen Qazaqstan» basylymynyń búgingi sanyndaǵy «Júregi Qazaqstan dep soǵady» atty maqalada.

Sondaı-aq atalmysh basylymnyń jazýynsha, keshe Memleket basshysy Nursultan Nazarbaev «Qazaqstan Respýblıkasy Prezıdentiniń Іs basqarmasynyń aýrýhanasy» RMK-da bolyp, josparly profılaktıkalyq medıtsınalyq tekserýden ótti.

Memleket basshysy medı­tsı­na­lyq ortalyq úzdik batystyq úl­giden kem túspeıtin eń zamanaýı medıtsınalyq jabdyq­tar­men jabdyqtalǵanyn atap ótti. «Búgin men Prezıdent Іs basqarmasynyń ortalyq emha­na­synda meniń densaýlyǵymdy baqylaıtyn jyl saıynǵy tekserýden óttim. Bizdiń barlyq memlekettik qyzmetshilerge, ásirese, basshy qyzmetkerlerge osynda qaralýǵa keńes beremin. El bas­shylyǵy, mınıstrler, ákimder osyndaı profılaktıkalyq tekserýden jyl saıyn ótýi kerek»,-dedi Elbasy. Bul másele jóninde keńirek bilgińiz kelse, «Egemen Qazaqstan» basylymynyń búgingi sanyndaǵy «Josparly tekserýden ótti» atty maqalany qarańyz.

***

«Aıqyn» basylymynyń jazýynsha, ultyna, násiline qaramaı elimizdiń barlyq turǵynyn «kazak» (qazaq emes) dep, al respýblıkamyzdyń ataýyn «Kazakstan» (Qazaqstan emes) dep jazýymyz kerek. «Qazaq» degen «erkin», «táýelsiz» degendi bildiredi, soǵan saı Kazakstan - bul erkin el. «Aspandaý» degen ǵylymı bilim berý qory «Megapolıs» gazetinde joǵarydaǵydaı aspandapty. Ony «Bul - qazaqstandyq tarıhshylardyń usynysy» dep orystildi keıbir elektrondy BAQ alaýlatyp, jalaýlatyp áketipti»,-dep jazady. Bul oqıǵanyń ári qaraı qalaı órbigenin «Aıqyn» basylymynyń búgingi sanyndaǵy «Qazaqstan úshin qaýipti usynys» atty maqaladan oqýǵa bolady.

Sondaı-aq «Aıqyn» basylymynyń jazýynsha, Mańǵystaý oblysyndaǵy jaǵdaı birqalypqa tústi. Qazir Aqtaý men Jańaózendegi ómir óz arnasyna túsip, búlingen, qıratylǵan ǵımarattardy ornyna qalpyna keltirý jumystary qolǵa alynyp, iske asyp jatyr. Bul jóninde keshe Elbasynyń Jarlyǵymen oblysqa jańadan taǵaıyndalǵan oblys ákimi Baýyrjan Muhamedjanov aımaqtaǵy BAQ ókilderimen bolǵan kezdesý barysynda málim etti. Osy júzdesýde kóterilgen ózge de máselelerdi «Aıqyn» basylymynyń búgingi sanyndaǵy «Jańaózende qalpyna keltirý jumystary bastaldy» atty maqaladan bilesizder.

***

«Alash aınasy» basylymynyń jazýynsha, álemdik sarapshylar Qazaqstan ekonomıkasynyń damý dınamıkasy jaıynda aıtqanda, onyń jaǵymdy-jaǵymsyz jaqtaryna toqtalǵandy unatady. Olardyń aıtýynsha, jaǵymdy tusy - bılik turaqtylyǵy men bir ortalyqtan basqarýdyń artyqshylyǵy. Bul túsinikti de. Sebebi jańa reformalar engizip, olar úshin jaýapty bolýǵa mindetteıdi. Ásirese, sońǵy daǵdarys eýropalyq demokratııanyń basty kemshiligin kórsetti - bıliktiń jıi aýysýy jaýapsyzdyqqa ákeledi. Óıtkeni jańa bılik burynǵynyń isine jaýap bergisi kelmeıdi, jańa reformalardy qabyldaýdy keshiktiredi. Sóıtip ýaqytty ótkizip alady. Osy turǵydan alǵanda, bizge bul jaǵynan qaýip joq. Nege? Bul saýaldyń jaýabyn «Alash aınasy» basylymynyń búgingi sanyndaǵy «Integratsııa - álemdik daǵdarysqa qarsy turýdyń ınstrýmenti» atty maqaladan bilýge bolady.

Sondaı-aq atalmysh basylymnyń jazýynsha, bıylǵy jyl Qazaqstan sportshylary úshin óte tabysty boldy deýge bolady. Halyqaralyq arenada óte joǵary jetistikterge qol jetkizip qana qoımaı, óz elimizde dúbirli dodalar ótkizip, bedelimiz ósti, abyroıymyz artty. Elimizdiń jyl basynan sport salasynda nendeı jetistikterge jetkendigin «Alash aınasy» basylymynyń búgingi sanyndaǵy «Sport salasy tabysty boldy» atty maqaladan egjeı-tegjeıli bilesizder.

***

Keshe Ortalyq saılaý komıssııasynyń tóraǵasy Qýandyq Turǵanqulov 2012 jyldyń 15-shi qańtaryna taǵaıyndalǵan Májilis depýtattarynyń kezekten tys saılaýyn baıqaý maqsatynda elimizge kelgen Eýropadaǵy qaýipsizdik jáne yntymaqtastyq uıymynyń Adam quqyqtary jáne demokratııalyq ınstıtýttar bıýrosy mıssııasynyń basshysy Mıklosh Harashtımen kezdesti. Bul kezdesý jabyq esik jaǵdaıynda ótti. Al onda aıtylǵan máselelerdi «Kazahstanskaıa pravda» basylymynyń búgingi sanyndaǵy «Vstrechı sa nablıýdatelıamı» atty maqaladan oqısyzdar.