Qazaqstan úshin energetıka salasyn jańǵyrtý aıqyndaýshy mánge ıe - Prezıdent

NUR-SULTAN. QazAqparat – Qazaqstan úshin energetıka salasyn jańǵyrtý aıqyndaýshy mánge ıe. Bul týraly QR Prezıdenti janyndaǵy Sheteldik ınvestorlar keńesiniń 34-jalpy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Biz shynaıy naryqtyq erkindik pen básekeles ekonomıka qurýǵa baǵyttalǵan eldiń jańa ekonomıkalyq baǵdaryn júzege asyryp jatyrmyz. Osyǵan oraı ınvestıtsııalyq ahýaldy júıeli túrde jaqsartýǵa erekshe nazar aýdaramyz», - dedi Qazaqstan Prezıdenti.

Memleket basshysy búgingi keńes otyrysynyń taqyryby ekonomıkany dekarbonızatsııalaýǵa jáne tómenkómirtekti tehnologııalardy engizýge arnalǵanyn atap ótti.

«Bul másele buryn-sońdy osynshama ózekti bolǵan emes. Klımattyq ózgeristerdiń sezilýi, onyń ishinde aýa temperatýrasynyń joǵarylaýy búkil álemde baıqalady. Sarapshylardyń boljamy kóńil kónshitpeıdi. Astyq túsiminiń jáne sý resýrstaryna qoljetimdiliktiń tómendeý qateri bar. Munyń barlyǵy kidirissiz júıeli is-sharalar qabyldaýdy talap etedi. Búginde Qazaqstanda parnıkti gaz shyǵaryndylarynyń 80 paıyzy qazbaly otynmen energııa óndirýge baılanysty. Osynaý negizgi faktor eldiń klımatyna teris áserin tıgizedi. Sondyqtan energetıka salasyn jańǵyrtý biz úshin aıqyndaýshy mánge ıe», - dedi Qasym-Jomart Toqaev.