Qazaqstan ýran ónerkəsibinde əlemde kóshbasshy ekenin dəleldedi - Ǵalymjan Pirmatov

ASTANA. QazAqparat - «Qazatomónerkásip» ulttyq kompanııasy ýran ónerkásibindegi álemdik kóshbasshy ekendigin dáleldedi. Bul týraly búgin AQHQO Bırjasynyń alǵashqy saýda-sattyǵynyń iske qosylý rásiminde atalǵan kompanııanyń basqarma basshysy Ǵalymjan Pirmatov aıtty, dep habarlaıdy QazAqparat.

«Qazatomónerkásip ýran ónerkásibiniń álemdik kóshbasshy retindegi óz mártebesin qýattaı otyryp, ІRO-ny tabysty ótkizdi jáne «Astana» HQO bırjasynyń lıtınginen ótken birinshi kompanııaǵa aınaldy. Siz 1997 jyly Jarlyǵyńyzben «Qazatomónerkásipti qurǵan edińiz. Sodan beri kompanııa Sizdiń strategııańyzdyń, birneshe myńdaǵan ujymymyz ben sheteldik seriktesterimizdiń eńbeginiń arqasynda teńdesiz transformatsııadan ótip, ýran óndirýden álemdegi nómiri birinshi kompanııaǵa aınaldy», - dedi ol sharaǵa qatysqan QR Prezıdenti Nursultan Nazarbaevqa qarata.

Onyń sózine qaraǵanda, endigi ýaqytta kompanııa aktsıonerleriniń qataryna qazaqstandyq ınvestorlar men halyqaralyq ınvestıtsııalyq qorlar kirip otyr.

«Biz kompanııanyń jetistikteri men keleshegin aktsıonerlerimizben bólisýge jáne elimizdiń ıgiligi jolynda damýdyń jańa kezeńine shyǵarýǵa daıynbyz», - dedi Ǵalymjan Pirmatov.

«Astana» HQO Bırjasy basqarmasynyń tóraǵasy Tımotı Bennett óz kezeginde «Qazatomónerkásiptiń» ІRO-ǵa shyǵarylýy Qazaqstannyń ekonomıkalyq damýy úshin mańyzdy ekendigin basa aıtty.

«Búgin «Qazatomónerkásip» úshin tarıhı kún ekendigi sózsiz. Kompanııa álemdik naryq kapıtalyndaǵy óz baýyrlastarymen birigip, úzdikterdiń úzdigi bola alatyndyǵyn kórsetti. Sonymen qatar bul ınvestorlar úshin ashyqtyqty, bıznes ósimin qoldaý úshin kapıtalǵa qoljetimdilikti jaqsarta túsedi», - dedi ol.

Buǵan deıin «Qazatomónerkásip» aktsııalary «Astana» halyqaralyq qarjy ortalyǵy Bırjasynda satylymǵa shyǵarylǵanyn, sondaı-aq Biryńǵaı jınaqtaýshy zeınetaqy qory «Qazatomónerkásip» aktsııalaryn satyp alǵanyn habarlaǵan edik.