Qazaqstan ýran óndirý kólemin odan ary tómendetýi múmkin be
Bul týraly búgin elordada ótip jatqan Azııadaǵy ıadrolyq kooperatsııalar forýmynyń mınıstrler deńgeıindegi 18-keńesi aıasynda BAQ ókilderine suhbat bergen QR Energetıka mınıstri Qanat Bozymbaev aıtty, dep habarlaıdy QazAqparat.
«Qazaqstan ýáde bergenindeı ýran óndirisi kólemin 10 paıyzǵa deıin tómendetti jáne jyl sońyna deıin de dál solaı bolady, eshteńe ózgermeıdi. 9 aıdyń qorytyndysy boıynsha óndirisi 10 paıyzdan sál astamǵa kemidi», - dedi ol.
Sonymen qatar Qanat Bozymbaev kelesi jylǵa ýran salasyndaǵy josparlarymen de bólisti.
«Kelesi jyly konıýnktýraǵa qaraımyz. Eger jyldyń sońynda konıýnktýra jaman bolsa, onda qaıta qarastyramyz. Óndiris kólemin kez kelgen ýaqytta arttyrýǵa bolady. Bizde ýran óndirýde tıimdi tehnologııalardyń biri bar jáne tez arada ulǵaıtýǵa bolady. Biraq, jaýapkershiligi bar iri óndirýshi retinde konıýnktýraǵa qaraýǵa tıispiz. Óıtkeni, baǵany quldyratyp, ózińe de, seriktesterińe de zııan keltirý ońaı. Sondyqtan baıyppen qaraǵan jón», - dedi mınıstr.
Aıta keteıik, ýran óndirý kólemin azaıtý týraly sheshim jaıynda jyldyń basynda jarııa etilgen bolatyn. Mundaı qadamǵa Qazaqstan álemdik konıýnktýradaǵy ýran baǵasynyń 47 paıyzǵa quldyraýynan keıin barǵan edi. Máselen, 2016 jyly 24,6 myń tonna óndirsek, bıylǵy jyldyń josparynda onyń kólemi 22,1 myń tonna bolyp belgilengen.