Qazaqstan UOK jáne Halyqaralyq Olımpıada Komıteti yntymaqtastyqty nyǵaıtady
Mılan men Kortınada ótetin 2026 jylǵy qysqy Olımpıada oıyndary, Los-Andjelestegi 2028 jylǵy jazǵy Olımpıada, Er-Rııadta 2025 jyly Olımpıada aıasynda alǵash ret ótetin kıbersport jarystary jáne Dakardaǵy 2025 jylǵy Jasóspirimder Olımpıadasy kezdesýde basty taqyryptardyń biri boldy. Kelissózder barysynda jarystardyń baǵdarlamasy, kólik-logıstıkalyq qamtamasyz etý, mádenı jáne bilim berý is-sharalary sekildi mańyzdy máseleler qaraldy.
Taraptar birlesken jumys pen tájirıbe almasýdyń halyqaralyq is-sharalardy joǵary deńgeıde uıymdastyrýǵa qamtamasyz etýdegi mańyzdylyǵyn atap ótti.
HOK-niń sport jónindegi dırektory Kıt MakKonnell Qazaqstannyń halyqaralyq yntymaqtastyqty nyǵaıtýdaǵy kúsh-jigerin joǵary baǵalap, Gennadıı Golovkınniń World Boxing uıymynyń Olımıadalyq komıssııasynyń tóraǵasy retindegi boksty Olımpıada baǵdarlamasynda saqtaý protsesindegi úlesin erekshe atap ótti. Qazaqstan UOK basshysy Halyqaralyq Olımpıadalyq komıtetimen yntymaqtastyqty kúsheıtýge daıyn ekenin jetkizdi.
– Olımpıada oıyndaryna daıyndyq – bul kúrdeli ári jaýapty is. Qazaqstan Halyqaralyq Olımpıadalyq komıtetimen belsendi kelissózder júrgizip jatqanyna qýanyshtymyz. HOK ókilderiniń bul saparyn ekijaqty yntymaqtastyqty nyǵaıtý jolyndaǵy mańyzdy qadam dep esepteımiz. Qazaqstan árqashan kelissózder men sportty damytýǵa jáne olımpıadalyq qozǵalysty qoldaýǵa baǵyttalǵan birlesken jumysqa daıyn, – dep atap ótti Gennadıı Golovkın.
Kezdesýge qatysýshylar sportshylardy qoldaý, olımpıadalyq sport túrlerin damytý jáne olımpıadalyq qundylyqtardy nasıhattaýǵa baǵyttalǵan birlesken jobalardy júzege asyrýdyń bolashaǵyn qarastyrdy.
Kelissózderden bólek, HOK delegatsııasy Astananyń basty sporttyq nysandaryn, sonyń ishinde «Barys Arena» muz saraıyn, «Qazaqstan» jeńil atletıka keshenin jáne «Jaqsylyq Úshkempirov atyndaǵy jekpe-jek saraıyn» aralady. Halyqaralyq qonaqtar ınfraqurylymnyń joǵary sapasyn jáne onyń álemdik standarttarǵa sáıkestigin erekshe atap ótti.