Qazaqstan UOK Muhammedsabyr Bazarbaıuly jekpe-jegine baılanysty shaǵym túsirdi

<p>PARIJ. KAZINFORM &mdash; Frantsııa astanasy Parıj qalasynda ótip jatqan Olımpıada oıyndarynda Qazaqstan Ulttyq Olımpıadalyq komıteti 63,5 keli salmaqta judyryqtasqan Muhammedsabyr Bazarbaıuly men grýzııalyq Lasha Gýrýlı arasyndaǵy jekpe-jek nátıjesin túsindirýdi talap etip, resmı túrde PBU-ǵa (Paris boxing Unit) shaǵym túsirdi.</p>

«Qazaqstan UOK Muhammedsabyr Bazarbaıulynyń jekpe-jegine qatysty shaǵym túsirdi. Biz bul nátıjemen kelispeımiz jáne PBU-dan túsiniktime talap ettik. Budan HOK ta habardar. Bizdiń oıymyzsha, qazaqstandyq boksshy 2024 jylǵy Olımpıadanyń jartylaı fınalyna joldama beretin mańyzdy kezdesýde jeńiske jetti. Ótken jekpe-jektiń nátıjesin qaıta qaraý múmkin emestigin de túsinemiz. Alaıda, biz iri halyqaralyq jarystaǵy tórelik ádil ári taza bolǵanyn qalaımyz», - dedi Qazaqstan UOK bas hatshysy Janar Ýtesheva.

Aıta keteıik, buǵan deıin Qazaqstan UOK qazaqstandyq boksshylardyń jekpe-jeginde tórelik etken jekelegen tóreshilerge qatysty PBU-ǵa eskertý jasady. Eskertý qabyldanyp, qazirgi tańda zertteý júrgizilip jatyr.

Esterińizge sala keteıik, osydan shamaly ýaqyt buryn Muhammedsabyr Bazarbaıuly tóreshiler sheshimimen jeńilip qalǵan bolatyn.