Qazaqstan ýnıversıtetteriniń fılıaldary shetelde ashylady
13:30, 01 Qarasha 2022
ASTANA. QazAqparat – Joǵary bilim berýdiń biryńǵaı Ortalyq Azııa keńistigin qurý jónindegi jumys jalǵasady. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.
«Qazaqstandyq joǵary oqý oryndarynyń eksporttyq múmkindikterin keńeıtý úshin fılıaldardy ashý is-sharalary jalǵasady. Joǵary bilim berýdiń biryńǵaı Ortalyq Azııa keńistigin qurý jónindegi jumys jalǵasady. Áriptestermen birlesip Qazaqstan platformasynda Ortalyq Azııa elderiniń ózara is-qımylyn úılestiretin bıýro qurý máselesi pysyqtaldy», - dedi S. Nurbek.
Osy oraıda ol joǵary bilim berýdi ınternatsıonaldandyrý bastamalary Qazaqstannyń «Jibek joly» halyqaralyq jobasy aıasynda jalǵasatynyn atap ótti.
Sonymen qatar mınıstr qazirgi ýaqytta joǵary bilim berý salasyndaǵy retteýshi 62 aktini qaıta qaraý boıynsha jumystar júrgizilip jatqanyn aıtty.