Qazaqstan úndistandyq týrısterdiń eń úzdik trend baǵyty bolyp tanyldy

ASTANA. QazAqparat - Qazaqstan Versatile Excellence Travel Awards (VETA) marapattaý rásiminde úndistandyq týrıster úshin eń úzdik trend baǵyty bolyp tanyldy, dep habarlaıdy QazAqparat.

Bul Úndistannyń týrızm salasyndaǵy jyl saıynǵy iri is-sharalarynyń biri, onda salanyń damýynda aıtarlyqtaı ósim kórsetken úzdik kompanııalar men týrıstik oryndar atap ótiledi.

Travelscapes - úkimettik mekemeler, birinshi dárejeli qonaqúıler, týrızm ındýstrııasy, elshilikter jáne korporatıvtik sektorlar arasynda tanymal úndilik kásibı b2b basylymy.

Marapattaý rásimine QR Mádenıet jáne sport mınıstrligi Týrızm ındýstrııasy komıtetiniń tóraǵasy Dastan Ryspekov qatysty.

«Úndistan azamattary úshin 14 kúndik vızasyz rejım engizilgennen beri biz Qazaqstanǵa úndi saıahatshylary sanynyń aıtarlyqtaı óskenin kórip otyrmyz jáne biz tanymal týrıstik baǵyt retinde tanylǵanymyzdy maqtan tutamyz. Bul jetistik - Qazaqstandy qalalyq, ekologııalyq, qyzyqty oqıǵaly, mádenı jáne MICE týrızm baǵyty retinde ilgeriletýde birlesken kúsh-jigerdiń nátıjesi», - dep atap ótti Dastan Ryspekov.

Aıta keteıik, ótken jyly elimizge 28 300 Úndistan azamaty kelgen.

Búgingi tańda Eqonaq aqparattyq júıesiniń derekteri boıynsha Qazaqstannyń qonaq úılerinde Úndistannan 2000-nan astam qonaq toqtaǵan.

Úndistan azamattary Qazaqstannyń Almaty, Astana jáne Shymkent sııaqty iri qalalarynda demalýdy jón kóredi.

Sondaı-aq, Qazaqstan bıyl Delıde ótip jatqan Ońtústik Azııadaǵy eń iri saıahat jáne týrızm kórmesi-SATTE-ge qatysady, Úndistan Respýblıkasy Týrızm mınıstrliginiń qoldaýymen Qazaqstan Shanhaı Yntymaqtastyq Uıymy elderiniń stendinde óteýsiz negizde usynylǵan.

Qazaqstandyq delegatsııa quramynda QR Mádenıet jáne sport mınıstrligi Týrızm ındýstrııasy komıtetiniń, Kazakh Tourism, tórt otandyq týroperator jáne áýe kompanııalarynyń ókilderi bar.