Qazaqstan Ulybrıtanııaǵa eksportty 750 mln dollarǵa ulǵaıtýǵa nıetti
«30 jyldan astam ózara yntymaqtastyq barysynda Ulybrıtanııa bizdiń ekonomıkamyzǵa 16 mlrd dollardan astam ınvestıtsııa quıdy. Osy oraıda, Ulybrıtanııa Qazaqstannyń negizgi saýda-ekonomıkalyq áriptesteriniń biri bolyp qala beredi. Qazir Qazaqstan naryǵynda brıtandyq kapıtaldyń qatysýymen 550-ge jýyq kompanııa jumys istep jatyr. Qazaqstan men Ulybrıtanııa arasyndaǵy strategııalyq áriptestiktiń kókjıegin keńeıtýdiń áleýeti zor ekenin habarlaý men úshin qýanyshty», - dedi Syrtqy ister mınıstriniń orynbasary Roman Vasılenko vedomstvoda ótken resmı kezdesýden keıin BAQ ókilderiniń saýalyna jaýap bere turyp.
Mınıstr orynbasarynyń aıtýynsha, Ulybrıtanııa tarapy shıkizatty óńdeýde, jasyl energetıka, kómirtegi beıtaraptyǵyn damytý men basqa da perspektıvaly salalar boıynsha qyzyǵýshylyq tanytyp otyr.
«Óz kezeginde Qazaqstan Brıtan naryǵyna eksportty 750 mıllıon dollardan astam somaǵa ulǵaıtýǵa nıetti. Ekijaqty saýda-sattyq kólemi jyldan-jylǵa ósip keledi. 2021 jyldan bastap 58,7%-ǵa artsa, byltyr 1,8 mlrd dollarǵa jetti», - deıdi R. Vasılenko.
Sondaı-aq, mınıstr orynbasary habarlaǵandaı, ekijaqty ekonomıkalyq damýdy tıimdi basqarý boıynsha ózara túsinistik týraly memorandýmǵa qol qoıylady.
«Memorandým jasalǵannan keıin Qazaqstan men Ulybrıtanııa arasynda saýda-ınvestıtsııalyq, bilim berý, mádenı jáne basqa salalar boıynsha seriktestigimizdiń jańa kezeńi bastalady», - dedi R. Vasılenko.
Aıta keteıik, búgin Ulybrıtanııanyń Syrtqy ister mınıstri Djeıms Kleverlı alǵash ret resmı saparmen Qazaqstanǵa keldi.
Buǵan deıin habarlaǵanymyzdaı, Djeıms Kleverlı Ulybrıtanııanyń qazaqstandyq munaı men gazdy eksporttaý joldaryn izdeýde kómekke daıyn ekendigin jetkizgen edi.