Qazaqstan-Ulybrıtanııa dıplomatııalyq baılanysyn dáriptegen jańa kitap jaryqqa shyqty

LONDON. QazAqparat – «Qazaqstan jáne Ulybrıtanııa. Strategııalyq áriptester». Tumandy Albıonda London men Astananyń 30 jyldyq dıplomatııalyq qarym-qatynasyn dáriptegen kitaptyń tusaýkeseri ótti. Kitapta qazaqstandyq jáne brıtanııalyq joǵary laýazymdy saıasatkerler óz estelikterimen bólisip, eki el arasyndaǵy yntymaqtastyqtyń búgini men bolashaǵy týraly syr shertedi, dep habarlaıdy QazAqparat tilshisi.

Ulybrıtanııa Uly dala elimen alǵashqylardyń biri bolyp resmı dıplomatııalyq qarym-qatynas ornatqan memleketterdiń qatarynda. Keıingi 30 jyl kóleminde qos el tyǵyz strategııalyq áriptestik ornata bildi jáne bul ıgi úrdis jalǵasyn taýyp keledi.

Kitap avtorlary Qazaqstanda qolǵa alynǵan aýqymdy reformalar áriptestikti nyǵaıtýǵa jol ashatynyn aıtady. Ásirese, olar iskerlik, qarjylyq jáne zań salalaryn qamtymaq. Bul bastamalar halyqaralyq terrorızm, ǵalamdyq jylyný, ıadrolyq, azyq-túlik, sý jáne energetıkalyq qaýipsizdik sııaqty jahandyq syn-qaterlerge birige tótep berýge múmkindik beredi.

«Sońǵy aılardyń ishinde baıqaǵanymyz saıası jáne ekonomıkalyq reformalar qolǵa alynyp jatyr. Bul Brıtan úkimeti qoldaýy tıis bastamalar dep oılaımyn. Saılaý, saıası partııalar jáne prezıdent bıliginiń merzimine qatysty ózgerister tek úkimetti ǵana emes, bıznes qaýymdastyqty da qýantady. Óıtkeni, Qazaqstannyń bul baǵytta oń nátıjelerge jetýi ınvestorlar úshin tıimdi», - deıdi 2018-2021 jyldar aralyǵynda Qazaqstanda Ulybrıtanııanyń elshisi bolǵan Maık Gıfford.

30 jyl kóleminde Ulybrıtanııa Qazaqstan ekonomıkasyna 20 mlrd dollardan astam qarajat quıdy. Keıingi 2 jylda bul tendentsııaǵa, tipti koronavırýs pandemııasy da kedergi bola almady. Kerisinshe, oń dınamıka baıqalyp, 2021 jyly ınvestıtsııa kólemi 20%-ke, ekijaqty saýda kólemi sońǵy 9 aıdyń qorytyndysy boıynsha 61%-ke ulǵaıǵan.

Kitap avtorlary, ıaǵnı Ulybrıtanııanyń eks premer-mınıstri, qos eldiń burynǵy jáne qazirgi elshileri, syrtqy ister mınıstrleri nátıjeli jumystyń jalǵasa beretindigine senimdi.

«Sharada 30 jyl ishinde saıasat pen ekonomıkada qol jetkizilgen jetistikter týraly ǵana emes, strategııalyq áriptestikti nyǵaıtý úshin bolashaqta jasalýy tıis jumystar da taldandy. Aýqymdy baǵyttardy alyp qaraıtyn bolsaq, búgingi talqylaýdan uqqanymyz kópshilikke aýylsharýashylyǵy, taý-ken óndirý, jasyl energetıka, transport-logıstıka salalarynyń keleshegi qyzyqty», - deıdi Qazaqstannyń Ulybrıtanııadaǵy elshisi Maǵjan Іlııasov.

Aldaǵy ýaqytta qos el arasyndaǵy saıası baılanystardyń belsendiligi odan ári artpaq. Atap aıtqanda, parlamentarııler arasyndaǵy yntymaqtastyqty nyǵaıtý kózdelip otyr. Sondaı-aq, Qazaqstan men Ulybrıtanııanyń iskerlik keńes baǵyty boıynsha tyǵyz áriptestik ornatý, shaǵyn jáne orta bıznes baılanystaryna basymdyq berý josparlanǵan.