«Qazaqstan» ulttyq arnasy japondyq NHK-pen yntymaqtaspaq

ASTANA. QazAqparat - «Qazaqstan» RTRK» AQ japondyq NHK habar taratýshy korporatsııasymen yntymaqtastyq ornatpaq, dep habarlaıdy QazAqparat telearnanyń baspasóz qyzmetine silteme jasap.

2017 jyldyń 27-29 qarasha aralyǵynda «Qazaqstan» RTRK» AQ delegatsııasy jumys saparymen Tokıoǵa baryp qaıtty. Sapar barysynda Japonııanyń eń tanymal telearnalarynyń biri - FujiTV-de bolyp, sol arnanyń tańǵy aqparattyq baǵdarlamalary men  jańalyqtar bóliminiń uıymdastyrylý erekshelikterimen tanysty.

Sondaı-aq, NHK korporatsııasyna baryp, búkil álemge habar taratatyn NHK World telearnasynyń  tanystyrý  rásimine qatysty.  Kezdesý aıasynda qazaqstandyq delegatsııa NHK habar taratýshy korporatsııasynyń Prezıdenti - Rıochı Ýedamen jáne birqatar departamentterdiń basshylarymen tanysyp, ekijaqty kelissózder júrgizdi.

«Qazaqstan» RTRK» AQ Basqarma tóraǵasy - Erlan Qarın Astana jáne EKSPO-2017 mamandandyrylǵan kórmesi jaıly túsirilgen arnaıy baǵdarlama úshin  japondyq áriptesterine alǵysyn bildirdi.

Aıta ketsek, uzaqtyǵy 2 saǵatqa jýyq atalmysh joba osy jyldyń  qazan aıynda japondyq NHK telearnasynyń efırinde kórsetilgen bolatyn.  Japondyq jýrnalısterdiń aıtýynsha bul japon televızııasy tarıhyndaǵy Qazaqstan jaıly túsirilgen eń aýqymdy jobalardyń biri. 

Kezdesý barysynda eki jaq bolashaq josparlarymen bólisip, birlesip  derekti fılmder shyǵarýmen qatar, ózara telehıkaıalar men kontent almastyrý  sııaqty yntymaqtastyq baǵyttaryn qarastyrdy.