Qazaqstan Ýkraınamen aradaǵy saýda isine alańdaýshylyq bildirdi

NUR-SULTAN. QazAqparat – Ýkraınaǵa Qazaqstannan jetkiziletin podshıpnık pen mıneraldy tyńaıtqysh boıynsha jergilikti bılik dempıngke qarsy tergeý jáne arnaıy qorǵaý sharalaryn qabyldaýy múmkin. Qazaqstan osyǵan oraı alańdaýshylyq bildirdi, dep habarlaıdy QazAqparat.

QR Saýda jáne ıntegratsııa vıtse-mınıstri Janel Kýshýkova Ýkraınanyń Ekonomıka, saýda jáne aýyl sharýashylyǵy mınıstriniń orynbasary – Saýda ókili Taras Kachkanyń jetekshiligimen kelgen Ýkraına delegatsııasymen saýda sharalary máseleleri boıynsha kezdesti.

«Kezdesýde Janel Kýshýkova Ýkraınanyń qazaqstandyq podshıpnıkteri men mıneraldy tyńaıtqyshtardy óndirýshi kásiporyndarǵa qatysty qorǵaý sharalaryn qabyldaýy múmkindigi jóninde alańdaýshylyq bildirdi.

Qazirgi ýaqytta Ýkraına tarapy Qazaqstan jasap jetkizetin podshıpnıkterge dempıngke qarsy tergep-tekserý jáne mıneraldy tyńaıtqyshtarǵa qatysty arnaıy qorǵaý tergep-tekserý júrgizýde», delingen habarlamada.

«Qazaqstan tarapy Ýkraına bıligi júrgizip jatqan qorǵaý tergep-tekserýlerine alańdaýshylyq bildiredi. Ýkraına naryǵy qazaqstandyq terbermeli moıyntirekter men mıneraldy tyńaıtqyshtardy óndirýshiler úshin dástúrli bolyp tabylady jáne olardy Qazaqstannan jetkizýge qatysty kedergilerdi belgileý qazaqstandyq óndirýshilerdiń ekonomıkalyq jaǵdaıyn aıtarlyqtaı qıyndatýy múmkin», – dedi Janel Kýshýkova.

Óz kezeginde, Ýkraına tarapy Eýrazııalyq ekonomıkalyq komıssııa júrgizetin dempıngke qarsy tergep-tekserýler týraly jáne EAEO elderi Ýkraınadan shyqqan taýarlarǵa qatysty qoldanatyn saýda sharalary týraly máselelerdi kóterdi.

Kezdesý aıasynda taraptar 2020 jylǵy 8-11 maýsymda Nur-Sultan qalasynda ótetin DSU-nyń aldaǵy 12-shi mınıstrlik konferentsııasynyń keıbir máseleleri boıynsha pikir almasty, onda Ýkraına tarapy bıznespen birlesip DSU kún tártibinde turǵan ózekti máselelerdi qaraýǵa qatysýdy josparlap otyr.

Taraptar budan basqa ekijaqty úkimetaralyq komıssııa ótkizý múmkindigin, sondaı-aq ekijaqty saýdany odan ári damytý máselelerin talqylady.

Aıta keterligi, Qazaqstanda terbermeli moıyntirekterdi «EPK Stepnogorsk» AQ ǵana óndiredi. Kásiporyn byltyr Ýkraına temir joldaryna podshıpnıkter jetkizýge tender utyp aldy. Ýkraınaǵa terbermeli moıyntirekterdiń ortasha jyldyq ımporty 2,1 myń tonna. Al, Qazaqstanda mıneraldy tyńaıtqyshtardy óndirýshi eki kásiporyn bar: «Qazfosfat» JShS jáne «QazAzot» AQ. Eki kásiporyn da jylyna orta eseppen Ýkraına naryǵyna 113 myń tonna mıneraldyq tyńaıtqysh jetkizedi.