Qazaqstan Ýkraınaǵa aıyna 140 myń tonna kómir jetkizbek

NUR-SULTAN. QazAqparat - Qazaqstan Ýkraınaǵa aıyna 140 myń tonna kómir jetkizbek. Bul týraly QR IIDM Indýstrııalyq damý jáne ónerkásiptik qaýipsizdik komıtetiniń tóraǵasy Qanat Baıytov aıtty, dep habarlaıdy QazAqparat tilshisi.

«Olqylyq boldy, buǵan deıin tolyq jetkize almadyq. Al qazir tolyq jetkizgimiz keledi. Premer-Mınıstr baryp, ýaǵdalasty. Jyldamdatatyn bolamyz. Qazir vagon bolsa bolǵany. Bul eń bastysy, tapsyrys beremiz. Kelissózder júrgizgen tamyz aıynda aıyna 80 myń tonna dep josparlaǵan edik. Ókinishke oraı irkilis boldy. Endi qarqyndy kúsheıtip, josparǵa jetý oıymyzda bar», - dedi komıtet basshysy Úkimet úıinde ótken baspasóz máslıhatynan keıin BAQ ókilderiniń saýalyna oraı.

Onyń aıtýynsha, qazaqstandyq kómir Ýkraınanyń Krıvoı Rog qalasyndaǵy Arselor Mıtall zaýytyna jetkiziledi.

«Biz olardy qamtamasyz etýimiz qajet. Endi kólemin ulǵaıtqymyz kelip otyr. Jyl sońyna deıin 140 myń tonnadan jetkizetin bolamyz», - dedi Q.Baıytov.