Qazaqstan Ýkraınada oqyp júrgen úndistandyq stýdentterdi qabyldaýǵa daıyn – Ajar Ǵınııat

NUR-SULTAN. QazAqparat – Qazaqstannyń medıtsına ýnıversıtetteri Ýkraınadaǵy úndi stýdentterin qabyldaýǵa daıyn. Bul týraly QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Úndistan úkimeti bizge resmı júgindi. Keshe elimizge Úndistannyń syrtqy ister jáne mádenıet mınıstri Mınakshı Lekhı keldi. Kezdesýde Ýkraınada jıyrma myńnan astam stýdenttiń bilim ala almaı qalǵany týraly másele kóterildi jáne bizden kómek surady. Jalpy, bizdiń ýnıversıtetter kómek kórsetýge, shamamen 200 stýdentti qabyldaýǵa daıyn», - dedi Ajar Ǵınııat Úkimet otyrysynan keıin BAQ ókilderine.

Onyń naqtylaýynsha, sheteldik stýdentter oqý aqysyn ózderi tóleıdi.

Sonymen qatar Densaýlyq saqtaý mınıstrligi múmkindikke qaraı úndistandyq stýdentterdi jataqhanamen qamtamasyz etý máselesi de qarastyrylatynyn atap ótti.