Qazaqstan Úkimeti Saýd Arabııasymen týrızm, avıatsııa salalaryn damytýdy talqylady

ASTANA. QazAqparat – QR Premer-Mınıstri Álıhan Smaıylov Saýd Arabııasy Koroldiginiń Qajylyq jáne ýmra mınıstri Taýfık ben Faýzan ál-Rabıamen týrızm, mádenıet jáne azamattyq avıatsııa salalaryndaǵy yntymaqtastyqty keńeıtý máselelerin talqylady. QazAqparat bul týraly primeminister.kz saıtyna silteme jasap habarlaıdy.

Premer-Mınıstr ótken jyldar ishinde Qazaqstan Respýblıkasy men Saýd Arabııasy arasynda dostyq jáne syndarly qatynas ornaǵanyn atap ótti.

«Álem musylmandary qajylyq paryzyn óteýdi asyǵa kútedi. Bıyl 4 myń otandasymyz da osyndaı múmkinshilikke ıe boldy. Buǵan Saýd Arabııasy basshylyǵynyń nazary men kúsh-jigeriniń arqasynda qol jetkizildi», — dedi Álıhan Smaıylov.

Sondaı-aq ol Astanada ótken Álemdik jáne dástúrli dinder kóshbasshylarynyń VII sezine belsendi qatysqany úshin Koroldik ókilderine alǵysyn bildirdi.

«Elder arasyndaǵy yntymaqtastyq keńeıip, nyǵaıa túsetinine senimdimin», — dedi Álıhan Smaıylov.

Óz kezeginde Taýfık ben Faýzan ál-Rabıa turaqty áýe reısteriniń ashylýy ekijaqty qarym-qatynasty nyǵaıtýǵa qosymsha serpin beretinin aıtty.

«Sapar aıasynda men qazaqstandyq áriptesterimmen birqatar tabysty kezdesýler ótkizdim. Tikeleı turaqty reısterdiń ashylýy Qazaqstannan keletin týrıster men qajylyqqa barýshylar sanynyń ósýine yqpal etedi dep úmittenemiz», — dedi Taýfık ben Faýzan ál-Rabıa.

Foto: primeminister.kz