Qazaqstan Úkimeti ekonomıkanyń ósimin 1%-ǵa jetkizý úshin jumys istep jatyr - B.Sultanov

ASTANA. QazAqparat - Qazaqstan Úkimeti ekonomıkadaǵy ósimniń deńgeıin bir paıyzǵa jetkizý úshin jumys istep jatyr. Bul týraly Astana ekonomıkalyq forýmy aıasynda jýrnalısterge elimizdiń Qarjy mınıstri Baqyt Sultanov málim etti.

Aıta ketsek, keshe Halyqaralyq valıýta qorynyń aımaqtyq konferentsııasyn ótkizgen Halyqaralyq valıýta qorynyń dırektory Krıstın Lagard Qazaqstannyń ekonomıkasyndaǵy ósim jyl sońyna deıin bir paıyzǵa jetedi degen boljam aıtqan edi.

«Jalpy, Astana ekonomıkalyq forýmyna qatysyp jatqan halyqaralyq sarapshylar men mamandardyń aıtyp otyrǵany - qazir ózgeristerge bet alatyn ýaqyt. Sondaı-aq, sarapshylar «Nurly jol» baǵdarlamasy, daǵdarysqa qarsy ózge de baǵdarlamalar der kezinde qabyldanǵan shara ekenin aıtyp otyr. Ulttyq qordaǵy rezerv, salyq saıasaty sııaqty qoldanyp otyrǵan ınstrýmentterimiz óte durys. Óıtkeni, biz kóp qaryz alǵan joqpyz, shyǵystardy azaıttyq, buny da sarapshylar jaqsy baǵalap otyr. Al, endi uzaqmerzimdi ózgeristerge toqtalatyn bolsaq, sarapshylar da tereń reforma kerek ekenin aıtyp otyr»,-dedi B.Sultanov.

«Krıstın Lagard Qazaqstannyń ekonomkasy jyl sońynda bir paıyz ósimge jetedi dep aıtty. Ol qandaı derekterge súıenip aıtty?» degen suraqqa jaýap bere kele Qarjy mınıstri: «bul bizdiń esepke de súıenip otyr, jáne óńirde bolyp jatqan ózgeristerge qarap, ózderiniń josparyna qarap aıtyp otyr. Qazaqstan úkimeti jyl sońyna deıin bir paıyz ósimge jetý úshin jumys istep jatyr» - dedi mınıstr.