Qazaqstan TJ kezinde TMD elderine kómektesýdiń tártibin aıqyndady

ASTANA. QazAqparat - Búgin QR Parlamenti Májilisiniń jalpy otyrysynda palata depýtattary «Táýelsiz Memleketter Dostastyǵyna qatysýshy memleketterdiń tótenshe jaǵdaılardyń aldyn alý jáne olardy joıý salasyndaǵy yntymaqtastyǵy týraly kelisimdi ratıfıkatsııalaý týraly» zań jobasyn maquldady.

«Kelisimge Memleket basshylary keńesiniń otyrysyn ótkizý barysynda 2015 jyldyń 16 qazanynda Býrabaıda qol qoıyldy. Atalǵan kelisimdi júzege asyrý osy qujatta qamtylǵan elderdiń biriniń aýmaǵynda TJ oryn alǵan jaǵdaıda birlesken úılestirilgen is-qımyldardy uıymdastyrýǵa yqpal etedi», - dedi QR Іshki ister mınıstri Qalmuhanbet Qasymov zań jobasyn tanystyrý barysynda.

Mınıstrdiń aıtýynsha, kelisimdi ratıfıkatsııalaý - tótenshe jaǵdaılardy monıtorıngileý men boljaý salasynda tájirıbe almasýǵa múmkindik beredi. Osy rette qater kezindegi is-qımyldarǵa halyqty daıarlaý, mamandardy oqytý, birlesken taqyryptyq konferentsııalardy, semınarlardy, jattyǵýlardy ótkizý sharalary qamtylyp otyr.

Atap aıtqanda, kelisimde taraptardyń yntymaqtastyqty iske asyrý nysandary kózdelgen, sondaı-aq tótenshe jaǵdaılardy joıý kezinde kómek kórsetý tártibi aıqyndalǵan. Qujattyń 5-babyna sáıkes, taraptar jazbasha suraý salý negizinde kómek kórsetedi. Onda tótenshe jaǵdaılardyń orny, ýaqyty, sıpaty, aýqymy jáne aǵymdaǵy kezdegi mán-jaıy, sonymen qatar suralatyn kómektiń basymdyqtary kórsetiledi.