Qazaqstan Týyn bıikte jelbiretý - basty maqsatymyz - Erbolat Baıbatyrov

ORAL. QazAqparat - Qaı ýaqytta bolsyn, elimizdiń Týyn bıikte jelbiretý - basty maqsatymyz. Bul týraly búgin Oralda Memlekettik rámizderdiń 25 jyldyǵyna oraı uıymdastyrylǵan «Meniń Týym» estafetasyna qatysqan sambodan tórt márte álem chempıony, álem kýbogynyń ıegeri, Qazaqstannyń eńbek sińirgen sport sheberi Erbolat Baıbatyrov málim etti, dep habarlaıdy «QazAqparat» tilshisi.

«Árbir azamat úshin, sonyń ishinde sportshy úshin Memlekettik rámizderdiń mańyzy erekshe. Biz sporttyq jolymyzda muny aıqyn sezinemiz. Qaı jarysqa qatyspaıyq, kók baıraǵymyzdy bıikke kóterip, Gımnimizdi oınatý úshin barymyzdy salamyz. Soǵan qol jetkizip te júrmiz. Jeńis tuǵyrynda turǵan kezde keýdemizdi elimiz úshin maqtanysh sezimi kerneıdi. Buǵan deıin tórt álem birinshiliginde top jarsam, ótken jyly kúmis júldege qol jetkizdim. Bıylǵy dúnıejúzilik doda 10-12 qarashada Reseıdiń Sochı qalasynda ótedi. Oǵan barý úshin Grýzııa, Túrkmenstan jáne Reseıde ótetin halyqaralyq jarystarda júldege iligip, joldamany jeńip alý kerek», dedi Qazaqstannyń eńbek sińirgen jattyqtyrýshysy Raıymbek Meńdiǵalıevtiń qolastynda jattyǵyp júrgen saıypqyran samboshy.

Búgin «Meniń Týym» estafetasy Oral-Atyraý joly boıynda, qalaǵa kireberiste ornalasqan «ORAL» jazýynyń aldynan bastaý aldy. Áýeli mototsıklshiler Qazaqstan Týyn «Dınamo» sport bazasyna jetkizse, sodan keıin kezek eskekshilerge tıdi. Eskekshiler Shaǵan ózenimen júzip ótip, qalalyq mádenıet jáne demalys saıabaǵyna deıin kelip, kók baıraqty Erbolat Baıbatyrov bastaǵan marafonshylarǵa tabys etti.

Sosyn veloshabandozdar Týdy jańa alańǵa deıin jetkizip, onda olardy óńirdegi jastar uıymdarynyń ókilderi fleshmob-bıimen qarsy aldy.

Memlekettik rámizder merekesine arnalǵan sharalar oblysta odan ári jalǵasýda.