Qazaqstan tutas aımaqtyń akademııalyq ortalyǵyna aınalady – Ǵylym mınıstri
Ǵylym jáne joǵary bilim mınıstri Saıasat Nurbek Qazaqstandaǵy ýnıversıtetterdiń jergilikti deńgeıde de, jahandyq deńgeıde de transformatsııalanyp jatqanyn aıtty.
«Ýnıversıtetterdiń birinshi mıssııasy – oqytý, ekinshisi – zertteý men ǵylym jáne úshinshi mıssııa – áleýmettik mıssııa. Sońǵy 50 jylda kóptegen tujyrymdamalar paıda boldy. Qazirgi ýaqytta akademııalyq orta men bıznes bir-birimen tyǵyz baılanysty. Al Qazaqstannyń ýnıversıtetteri jergilikti qoǵamdastyqtyń damý ortalyqtaryna aınalýda, - dep atap ótti mınıstr.
Mınıstr úsh jyl buryn Kókshetaý ýnıversıtetteriniń birinde iske qosylǵan qarttarǵa arnalǵan baǵdarlamany mysalǵa keltirdi.
«Bul baǵdarlama qoǵamdastyq úshin óte úlken jetistik boldy jáne tańqalarlyq nátıjelerge qol jetkizildi. Egde jastaǵy adamdar oqyǵan eń tanymal kýrstar arasynda aǵylshyn tili, Python tilinde baǵdarlamalaý, derekter týraly ǵylym, baǵdarlamalyq jasaqtama, veb-dızaın bar. Qazir bul qarttar belsendi bolyp, qoǵamǵa kóbirek aralasqysy keledi, birneshe keńes quryp, jergilikti bılikke kómektese bastady. Osylaısha, olar zeınetke shyqqan soń, úıde otyrýdyń ornyna jergilikti qoǵamdastyqtardyń ómirine belsendi qatysýǵa múmkindik aldy», - dedi S. Nurbek.
Sondaı-aq, onyń aıtýynsha, ýnıversıtetter tek bilim berý men ǵylymı ortalyqtar ǵana emes, el úshin ekonomıkalyq tirek bolyp otyr.
«Qazaqstan qazir tutas Ortalyq Azııa aımaǵy úshin akademııalyq ortalyq retinde ózin tanytýǵa, belsendi ilgeriletýge tyrysýda. Bizdiń aımaqta eki mıllıard adam turady. Bul álemdegi eń jas aımaqtardyń biri, halyqtyń mıllıardtan astamy – 25 jasqa deıingi jastar. Sondyqtan biz qazir kóptegen ýnıversıtetterdi shaqyryp jatyrmyz. Ýnıversıtet tek oqý nemese ǵylymı zertteýler júrgizý orny ǵana emes, ekonomıkalyq tirek te bolyp otyr. Ol ınvestıtsııa ákeledi, adamdardy, jańa stýdentterdi, talanttardy tartady. Birneshe aptada álemniń túkpir-túkpirinen 100 myńǵa jýyq stýdent jınalǵan Dúnıejúzilik kóshpendiler oıyndaryn qaraıyq, olar Astanada qyzmet kórsetý salasynda eleýli qarjy jumsady. Endi Úkimet jańa ólshem – ekonomıkalyq qyzmetti qosatynymyz týraly jańa túsinikke ıe boldy», - dep atap ótti Ǵylym mınıstri.
Q.Jubanov atyndaǵy Aqtóbe óńirlik ýnıversıtetiniń rektory Laýra Qarabasova joǵary bilim berý salasyndaǵy jahandaný úrdisteri óńirlik ýnıversıtetterdiń qyzmetin keńeıtip, ulttyq, jahandyq deńgeıde yqpalyn kúsheıte túskenin atap ótti.
«Osyǵan deıin ulttyq nemese ortalyqtaǵy iri joǵary oqý oryndarymen salystyryp, óńirlik ýnıversıtetterdiń múmkindigi men mıssııasyna qatysty shekteýler jóninde pikirler bolatyn. Alaıda, joǵary bilim berý salasynda júrip jatqan jahandyq úrdister budan bylaı ýnıversıtetterdi halyqaralyq, ulttyq, óńirlik degen deńgeılermen shekteýge kelmeıtinin kórsetkendeı. Aqtóbe óńirinde ornalasqan Jubanov ýnıversıtetiniń mysalynda strategııalyq seriktesimiz ulybrıtanııalyq Herıot-Ýott ýntversıtetimen tyǵyz baılanys ornatyp, jumys isteı bastaǵanda osyny túsindik. Óńirlik oqý oryndary seriktesteriniń tájirıbesin zerttep, standarttaryn engize otyryp, halyqaralyq deńgeıge umtylysy arqyly qoǵamdaǵy beınesin ózgertip jatyr. Árıne, óńirlik ýnıversıtetter eń aldymen ózi ornalasqan oblystyń áleýmettik-ekonomıkalyq damýyna úles qosyp, mamandar daıyndap, jergilikti óndiris oryndarynyń máselelerin sheshýge jumys isteıdi. Degenmen, biz jahandyq máselelerdi óz aımaǵymyzdyń deńgeıinde kóterip, ulttyq jobarlardy júzege asyrý arqyly óńirlik deńgeıden shyǵyp, áldeqaıda aýqymdy mindettemelerdi alyp otyrmyz. Osylaısha, Batys Qazaqstan óńirimen ǵana baılanysty bolyp kelgen Jubanov ýnıversıteti, onyń ishinde Herıot-Ýott kampýsy búginde respýblıkanyń basqa da óńirlerinen talantty stýdentterdi qabyldap, ulttyq kadrlardy daıarlaýǵa úles qosyp otyr», — dedi L.Qarabasova.