Qazaqstan túrmedegiler sany boıynsha álemde 41-orynnan 47-orynǵa tústi - Joǵarǵy sot

ASTANA. QazAqparat - Qazaqstan túrmedegiler ındeksi boıynsha álemde 41-shi orynnan 47-shi orynǵa tústi. Bul týraly búgin QR Joǵarǵy Sotynda respýblıka sottarynyń 2015 jyldyń birinshi jartyjyldyǵynda atqarǵan jumys qorytyndylaryna arnalǵan keńeıtilgen keńeste málim boldy.

Keńes barysynda Joǵarǵy sot tóraǵasy Qazaqstandaǵy túrmedegiler sanynyń azaıý úrdisiniń oryn alyp otyrǵanyn atap ótti. Máselen, búgingi kúni bas bostandyǵynan aıyrylýǵa qatysty sottalǵandardyń úles salmaǵy ótken jyldyń alǵashqy jartyjyldyǵymen salystyrǵanda 11,5 paıyzǵa azaıǵan.

«Taldaýlar kórsetkenindeı, sottar bas bostandyǵynan aıyrý úkimderin shyǵarýdy azaıtyp, onyń ornyna balama jaza túrlerin shyǵarýdy arttyryp otyr. Bul rette sottalǵandardyń úles salmaǵy byltyrǵy jylmen salystyrǵanda 11,5 paıyzǵa azaıdy, kerisinshe, balama jaza túrleri boıynsha shyǵarylǵan úkimder sany 20 paıyzǵa artty. Jazanyń balama túrin qoldanýdyń arqasynda bizdiń elimizde sottalǵandar sany aıtarlyqtaı azaıyp otyr», - dedi Qaırat Mámı.

Sonymen qatar Bas prokýratýranyń málimetterine súıene otyryp, Joǵarǵy sot tóraǵasy Qazaqstan alǵash ret túrmedegi adamdar sany reıtıngin 6 pozıtsııaǵa jaqsartqanyn atap ótti.

«Biz túrme reıtıngi boıynsha 41-shi orynnan 47-shi orynǵa tústik. Bul Memleket basshysynyń Qazaqstandy túrmedegiler ındeksi boıynsha kósh basynda turǵan elý eldiń qatarynan shyǵarý týraly tapsyrmasyna sáıkes keledi. Aıta keterligi, túrmedegiler sanynyń «kóshbasshy» elý eldiń tiziminen shyǵý úshin bizde bas bostandyǵynan aıyrylǵandar sany 41 myńǵa deıin azaıýy tıis. Búgingi kúni bizdiń bas bostandyǵynan aıyrý oryndarymyzda 44,5 myń adam otyr», - dedi Q.Mámı.