Qazaqstan túrli sebeptermen shetelge 8 adamdy berýden bas tartty
«Búginde Qazaqstan quqyqtyq sharttarǵa baılanysty 55 memleketpen qol qoıdy. Bul óz kezeginde bizdiń quqyqtyq ústemdikke senim artqandyǵyn bildiredi. Óıtkeni árbir osyndaı qujat boıynsha biz ózimizge tıisti mindettemeni alamyz. Sondyqtan jyl saıyn shamamen 100-den astam adamdy biz beremiz. Sonymen qatar byltyr bizdiń suraýymyz boıynsha 103 azamat Qazaqstanǵa berildi, al 85 adamdy basqa elderdiń suraýymen olarǵa tapsyrdyq. Bul quqyqtyq kómekti kórsetý barysyndaǵy qadamdar»,-dedi M. Ahmetjanov.
Onyń sózine qaraǵanda, ótken jyly jalpy 8 adamdy berýden bas tartyldy.
«Bul turǵyda tek saıası sebepter ǵana emes, jalpy bas tartýǵa negiz bolatyn toǵyz talap eskerildi. Birinshiden, bizdiń jáne olardyń zańnamasy boıynsha osy azamattardyń áreketi qylmystyq sıpatqa ıe bolýy tıis. Ekinshiden, árbir aktige jekeleı qarastyrylady, eger adam bosqyn mártebesine ıe bolsa, onda ony berýden bas tartylady.. Ózderińiz bilesizder, osy salada BUU usynystary bar. Adamdar osy talaptardyń aıasynda qamtylsa, biz bul baǵytta halyqaralyq quqyq standarttaryn ustanyp, suralǵan azamattardy bermeımiz»,-dep túsindirdi Bas prokýrordyń orynbasary.
Aıta keteıik, búgin Senattyń jalpy otyrysynda palata depýtattary «Qazaqstan Respýblıkasy men Serbııa Respýblıkasy arasyndaǵy qylmystyq ister boıynsha quqyqtyq kómek týraly shartty ratıfıkatsııalaý týraly», «Qazaqstan Respýblıkasy men Serbııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly», «Qazaqsan Respýblıkasy men Serbııa Respýblıkasy arasyndaǵy ustap berý týraly shartty ratıfıkatsııalaý týraly» zań jobalaryn qabyldady.