Qazaqstan túrli elderden koronavırýsqa qarsy vaktsınany salyp alý máselesin zerttep jatyr - mınıstr

NUR-SULTAN. QazAqparat – Densaýlyq saqtaý mınıstri koronavırýs ınfektsııasyna qarsy Qazaqstan qaı eldiń vaktsınasyn tańdaýy múmkin ekenin aıtyp berdi, dep habarlaıdy QazAqparat tilshisi.

«Qazaqstan qazirgi ýaqytta ártúrli memleketterdiń vaktsınasyn zerttep jatyr. Buǵan deıin aıtylǵanyndaı álem elderiniń vaktsınalary ártúrli klınıkalyq zertteýlerden ótedi. Reseılik vaktsınaǵa qatysty aıtar bolsam, biz ondaǵy áriptesterimizben seriktese jumys júrgizip jatyrmyz. Vaktsına klınıkalyq zertteýlerdiń bárinen ótip baryp, jappaı el ishinde qoldanyla bastaǵany týraly resmı málimdeme jasalǵannan keıin ǵana biz ony elge ákele bastaımyz. Mundaı aqparat kelip túsken kezde ǵana qarastyramyz», - dedi Alekseı Tsoı OKQ-da ótken baspasóz máslıhatynda.

Mınıstrdiń aıtýynsha Qazaqstanǵa eń birinshi kezekte vaktsınalar boıynsha zertteýdiń naqty nátıjeleri kerek. Alekseı Tsoı vaktsınanyń tıimdiligi rastalǵan jaǵdaıda reseılik áriptestermen Qazaqstanǵa aldyńǵy kezekte jetkizý máselesi kelisilgenin jetkizdi.

«Dál mundaı kelisimge vaktsına shyǵarýshy basqa memlekettermen de kelip otyrmyz. Onyń ishinde Qytaıda jasalatyn vaktsınalar bar. Qytaılyq mamandar BAÁ-men birge klınıkalyq synaqtardy ótkizýde. Basqa da vaktsınalar qazir klınıkalyq deńgeıde zerttelip, synaq jumystary aıaqtalýǵa jaqyn qaldy. Jalpy bárimen baılanystamyz. Nátıje shyǵatyn naqty ýaqytty kútip otyrmyz. Álemdik qaýymdastyqtar ol týraly mindetti túrde habarlaıdy. Osydan keıin ǵana eń birinshi kezekte naqty qandaı vaktsınany alatynymyz týraly naqty sheshim qabyldanady», - dedi Densaýlyq saqtaý mınıstri.