Qazaqstan Túrikmenstanǵa eksport kólemin 120 mıllıon dollarǵa deıin ulǵaıtýǵa daıyn - Prezıdent

<p>ASTANA. KAZINFORM - Memleket basshysy Túrikmenstan Prezıdentimen keńeıtilgen quramda kelissóz júrgizdi, dep habarlaıdy Aqordanyń baspasóz qyzmeti.&nbsp;</p>

Qasym-Jomart Toqaev bul saparyn ortaq maqsatqa qol jetkizý, ıaǵnı sanqyrly memleketaralyq baılanysty múldem jańa deńgeıge kóterý jolyndaǵy mańyzdy qadam dep atady.

– Qazaqstan men Túrikmenstan ǵasyrlar boıy jalǵasqan dostyqqa, tatý kórshilik qarym-qatynasqa jáne ortaq mádenı, tarıhı qundylyqtarǵa arqa súıeı otyryp, baýyrlas memleketter retinde berik ári úılesimdi baılanys qura bildi. Bizdiń osynaý yntymaqtastyǵymyz strategııalyq seriktestik baǵytynda damyp keledi, – dedi Prezıdent.

Memleket basshysynyń aıtýynsha, sońǵy jyldary saýda-ekonomıkalyq yntymaqtastyqta aıtarlyqtaı ilgerileý bar. Sonymen qatar Qazaqstan Túrikmenstanǵa eksporttyń jalpy kólemin 80 taýar túri boıynsha 120 mıllıon dollarǵa deıin ulǵaıtýǵa daıyn ekenin málimdedi.

Prezıdent eki eldiń isker toptary arasyndaǵy baılanysqa qoldaý kórsetýdiń mańyzyna toqtaldy.

– Maǵan baıandalǵan málimetke sáıkes, shaǵyn jáne orta bıznes ınvestıtsııalyq áleýetke ıe ekenin kórsetip otyr. Byltyr Qazaqstan kompanııalarynyń Túrikmenstanǵa bıznes týry uıymdastyryldy. Osy oraıda Qazaq-túrikmen iskerlik keńesi alańynda kásipkerlerdiń belsendiligin yntalandyrý asa mańyzdy. Іskerlik orta negizgi qozǵaýshy kúshke aınalýy kerek. Eki eldiń iri kommertsııalyq jáne ulttyq kompanııalarynyń kúsh-jigerin ónerkásip, qurylys, logıstıka, baılanys jáne ekonomıkanyń basqa da salalaryndaǵy naqty jobalardy iske asyrýǵa jumyldyrǵan jón dep sanaımyn. Búgin qol qoıylatyn Investıtsııalardy yntalandyrý jáne ózara qorǵaý týraly úkimetaralyq kelisim bul úderiske tyń serpin beretinine senimdimin, – dedi Qasym-Jomart Toqaev.

Qazaqstan Prezıdenti mádenı-gýmanıtarlyq qarym-qatynastardyń dáıekti túrde damyp kele jatqanyn, sondaı-aq joǵary bilim salasyndaǵy yntymaqtastyqtyń keleshegi kemel ekenin jetkizdi.

Memleket basshysy oraıly sátti paıdalanyp, týysqan túrikmen halqyn áıgili aqyn Maqtymquly Pyraǵynyń 300 jyldyq mereıtoıymen quttyqtady.

Serdar Berdimuhamedov Qazaqstan Prezıdentiniń Túrikmenstanǵa sapary ekijaqty yqpaldastyqty keńeıtý turǵysynan mańyzdy dep sanaıdy

– Qazaqstan Prezıdentiniń resmı sapary elderimiz arasyndaǵy tatý kórshilik pen tyǵyz áriptestik baılanystardy odan ári nyǵaıtýǵa, seriktes salalardaǵy ózara yqpaldastyqty keńeıtýge, perspektıvti baǵyttardy damytýǵa oń áser etedi. Qazaq-túrikmen qarym-qatynasy ǵasyrlar qoınaýynan tamyr tartady. Osy ýaqyt ishinde shynaıy baýyrlastyq baılanys qalyptasty. Qos memleket pen halyqtarymyzdy geografııalyq ornalasýy ǵana emes, birtutas tarıhı taǵdyrlastyqty sezinýi men bir-birine qajet ekenin túsinýi biriktiredi. Biz ortaq qundylyqtarymyzdy qasterleımiz, babalardan muraǵa qalǵan dástúrimizdi qurmetteımiz ári muqııat saqtaımyz, – dedi Serdar Berdimuhamedov.

Kezdesý barysynda saýda-ekonomıkalyq yntymaqtastyqtyń qazirgi ahýaly men bolashaǵy talqylandy. Gaz salasyndaǵy birlesken bastamalardy júzege asyrý, ózara saýda men eki eldiń aýmaǵy arqyly tasymaldanatyn júk kólemin júıeli túrde arttyrý, sondaı-aq óńiraralyq yqpaldastyqty jandandyrý máselelerine aıryqsha mán berildi.

Osyǵan deıin Qasym-Jomart Toqaev pen Serdar Berdimuhamedov shaǵyn quramda kelissóz júrgizgenin jazǵan edik.