Qazaqstan, Túrikmenstan jáne Aýǵanstan jańa temirjol magıstraliniń qurylysyn talqylady
Taraptar Túrikmenstannyń batys shekarasynan Aýǵanstan arqyly Pákistanǵa jáne odan ári Úndistanǵa ótetin Týrgýndı – Gerat – Kandagar – Spın – Býldak jańa temirjol magıstralin salý múmkindikterin talqylady.
Bul jobany júzege asyrýǵa Túrikmenstan Mınıstrler Kabıneti janyndaǵy Kólik jáne kommýnıkatsııalar agenttiginiń basshysy Mammethan Chakyev birlesip qatysýdy usyndy. Onyń aıtýynsha, túrikmen tarapy aýǵanstandyq áriptesterimen Týrgýndıda logıstıkalyq ortalyq qurýǵa kelisken jáne jaqyn arada qurylysqa kirisýge nıetti.
Astyqty, konteınerlerdi jáne basqa da júkterdi aýystyryp tıeý úshin nysandar salý josparlanýda. Joba iske qosylǵannan keıin logıstıkalyq ortalyq Týrgýndı tarapynan júk aınalymynyń artýyna serpin beredi dep kútilýde.
«Biz qazaqstandyq tarapty qurylysqa qatysýǵa shaqyramyz. Sizderde joǵary temirjol tóseminiń sapaly óndirisi bar ekeni belgili. Basqa da kóptegen múmkindik bar. Týrgýndı – Gerat bul tek temirjol qurylysy emes, sonymen qatar júk aǵynyn odan ári damytý, osy baǵyt boıynsha júkterdi tartý. Qazaqstandyq taraptyń qatysýymen biz osy dálizdiń tartymdylyǵyn birneshe ese arttyra alamyz», — dep atap ótti Mammethan Chakyev.
Aýǵan tarapynyń ókilderi Qazaqstan men Túrikmenstan arqyly Pákistanǵa júkterdiń tranzıtin qamtamasyz etýge daıyn ekendikterin bildirdi. Olar tasymaldaý protsesiniń barlyq qatysýshysy úshin osy dálizdi damytýdyń tıimdiligin atap ótip, Qazaqstan men Túrikmenstan aýmaqtary arqyly qytaı taýarlaryn ımporttaýǵa qyzyǵýshylyq bildirdi.
«Biz jańa temirjol baǵytyn birlesip júzege asyrý týraly usynystardy quptap, Túrikmenstan men Aýǵanstannyń Týrgýndı – Gerat jolyn salý jospary bar ekenin estigenimizge qýanyshtymyz. Joba taraptarynyń kúsh biriktirýi óte mańyzdy. Biz Túrikmenstan ıdeıasyn qoldaımyz, bul is júzinde Aýǵanstan arqyly Pákistanǵa jáne odan ári Úndistanǵa batys dáliz qurylysynyń bastalýy», — dep atap ótti Serik Jumanǵarın.
Sonymen qatar Qazaqstan vıtse-premeri Iran delegatsııasymen kezdesý ótkizip, onda kólik jáne logıstıka ınfraqurylymyn damytý jónindegi birlesken nıetterdi iske asyrý barysy talqylandy.