Qazaqstan Túrkııamen áskerı yntymaqtastyqtyń jańa baǵytyn talqylady

NUR-SULTAN. QazAqparat - Qazaqstan men Túrkııa Respýblıkalary qorǵanys vedomstvolarynyń ókilderi beınekonferentsııa arqyly radıatsııalyq, hımııalyq jáne bıologııalyq qorǵaý salasyndaǵy yntymaqtastyq máselelerin talqylady, dep habarlaıdy QazAqparat.

QR Qorǵanys mınıstrliginiń baspasóz qyzmetinen málim etkendeı, kelissózderge Qazaqstan tarapynan bas shtab bastyǵy – Radıatsııalyq, hımııalyq jáne bıologııalyq qorǵaý áskerleri departamentiniń bastyǵy podpolkovnık Erjan Qulmaǵambetov qatysty.

«Búgingi kúni bul baǵyt memleketterimiz úshin óte ózekti bolyp tabylady. Bizdiń pikirimizshe, osy saladaǵy yntymaqtastyqty uıymdastyrý eki eldiń qorǵanys qabiletiniń jaı-kúıine oń yqpal etedi», – dep atap ótti ol.

Podpolkovnık Erjan Qulmaǵambetovtiń aıtýynsha, áskerlerdiń soǵys jáne beıbit ýaqytta mindetterdi oryndaýyna ázir bolýyn arttyrý maqsatynda Qazaqstan Qarýly Kúshteriniń radıatsııalyq, hımııalyq jáne bıologııalyq qorǵaý júıesin damytý jáne jańǵyrtý búgingi kúnniń negizgi basymdyǵy bolyp tabylady.

Taraptar mamandardy daıarlaýǵa, bólimshelerdiń jaýyngerlik daıarlyǵy protsesine jáne olardy tehnıkalyq jaraqtandyrýǵa qatysty ózara is-qımyldyń perspektıvalyq baǵyttaryn talqylady.

Radıatsııalyq, hımııalyq jáne bıologııalyq qorǵaý – bul Qazaqstan men Túrkııa qorǵanys vedomstvolary arasyndaǵy yntymaqtastyqtyń jańa baǵyty. Ol zaman talabyna sáıkes damytýdy qajet etedi. RHBQ áskerleriniń qajet ekenin koronavırýs ınfektsııasynyń pandemııasy aıqyn kórsetip berdi. Bul kezeńde áskerı qyzmetshiler áleýmettik turǵydan mańyzdy obektilerdi dezınfektsııalaý boıynsha mindetterdi oryndady.