Qazaqstan - túrkııalyq drondardy shyǵaratyn alǵashqy shet el bolmaq

NUR-SULTAN. QazAqparat – «Kazakhstan Engineering» enshiles kompanııasynyń bazasynda ANKA drondaryn qurastyrý jáne olarǵa tehnıkalyq qyzmet kórsetý jelisi uıymdastyrylady, dep habarlaıdy QazAqparat QR Indýstrııa jáne ınfraqurylymdyq damý mınıstrligine silteme jasap.

«10 mamyrda Ankarada «Kazakhstan Engineering» UK» AQ men «Turkish Aerospace» arasynda áskerı-tehnıkalyq yntymaqtastyq týraly memorandýmǵa qol qoıyldy. Qujattyq kelisimge sáıkes, Qazaqstanda «Kazakhstan Engineering» enshiles kompanııasynyń bazasynda ANKA urmaly ushqyshsyz ushý apparattaryn qurastyrý jáne olarǵa tehnıkalyq qyzmet kórsetý jelisi uıymdastyrylady»

, - dep málimdeıdi mınıstrlik.

Qujatqa «Qazaqstan Injınırıng» UK» AQ Basqarma tóraǵasy Temirjan Ábdirahmanov jáne «Turkish Aerospace» (TUSAŞ) prezıdenti, professor Temel Kotıl qol qoıdy. Kelisim aıasynda qurylǵyny birlesip óndirý, tehnıkalyq qyzmet kórsetý jáne jóndeý úshin tehnologııalardy berý men personaldy oqytý jaǵy josparlandy.

Osylaısha, Qazaqstan ANKA drondary óndirisi jolǵa qoıylǵan alǵashqy shet el boldy.

«Jańa kelisim baýyrlas Qazaqstanmen dostyq baılanystardy odan ári nyǵaıtýǵa yqpal etedi», - deıdi Temel Kotıl.

ANKA barlaý jáne soqqy drondary 2013 jyly Túrkııada qurastyryldy. Urys jaǵdaıynda synaldy. UUA–nyń eń joǵary ushý salmaǵy - 1 700 kg, paıdaly júktemeni 350 kg deıin kóterýge qabiletti. Ushý ýaqyty - eń joǵary bıiktigi 9 000 m deıin 30 saǵatqa jetedi. Qanatynyń uzyndyǵy - 17,5 m, uzyndyǵy - shamamen 8 m.

Eske salsaq, Qazaqstan men Túrkııa arasynda Áskerı yntymaqtastyq týraly kelisimge qol qoıyldy.