Qazaqstan Túrkııaǵa ushatyn áýe reısteri sanyn arttyrady

NUR-SULTAN. QazAqparat - 2021 jylǵy 31 tamyzda Qazaqstan Respýblıkasy aýmaǵynda koronavırýs ınfektsııanyń paıda bolýy men taralýyna jol bermeý jónindegi vedomstvoaralyq komıssııanyń (budan ári - Vedomstvoaralyq komıssııa) kezekti otyrysyna Qazaqstan men Túrkııa arasyndaǵy reısterdi ulǵaıtý máselesi shyǵaryldy.

Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

Osylaısha, 2021 jyldyń qyrkúıek aıynyń ortasynan bastap Air Astana jáne Turkish Airlines áýe kompanııalary (Air Astana - 17 qyrkúıekten, Turkish Airlines - 25 qyrkúıekten) Almaty – Ystanbul baǵytyndaǵy reıster sanyn 2-den 3 reıske deıin arttyrýdy josparlap otyr.

Sondaı-aq, 2021 jylǵy 22 qyrkúıekten bastap SCAT áýe kompanııasy Aqtóbe - Ystanbul baǵytynda aptasyna 2 reıspen usha bastaıdy.

Túrkııamen aradaǵy reıster sanyn ári qaraı arttyrý epıdemıologııalyq jaǵdaıǵa, Vedomstvoaralyq komıssııanyń jáne Túrkııanyń tıisti memlekettik organdarynyń sheshimderine baılanysty bolady.

«Reıster sanıtarlyq-epıdemıologııalyq talaptardy qatań saqtaı otyryp jáne áýe kompanııalarynyń saıtynda jarııalanǵan kestege sáıkes oryndalady»,-delingen habarlamada.