Qazaqstan – Túrkııaǵa munaı ónimderin jetkizýden kóshbasshylar tiziminde

ANKARA. QazAqparat – Qazaqstan munaı óndirý jáne munaı óńdeý salasynda Túrkııanyń eksportshylary arasynda kóshbasshylar qatarynda tur, dep habarlaıdy QazAqparat menshikti tilshisi.

Ótken jyly Túrkııanyń munaı men munaı ónimderiniń negizgi eksporttaýshysy Reseı 2 mln 516 myń tonna jetkizgen. Odan keıin Irak – 500 myń 908 tonna. Qazaqstan 266 myń 713 tonna eksport kórsetkishimen alǵashqy úshtikti tuıyqtaǵan.
Túrkııanyń energetıkalyq naryqty retteý basqarmasynyń derekterine sáıkes, 2022 jylǵy qarashada elge munaı jáne munaı ónimderi ımportynyń jalpy kólemi 3 mln 967 myń 559 tonnaǵa deıin qysqardy. Bul kórsetkish 2021 jylmen salystyrǵanda 7,4%-ǵa az.
Dızel otynyn satyp alý 3%-ǵa (919 097 tonnaǵa deıin) qysqarǵan. Túrkııa ımportynyń qalǵan bóligin avıatsııalyq jáne keme otyny, benzın, mazýt jáne basqa da munaı óńdeý ónimderi quraıdy.
Sonymen qatar ótken jyldyń qarasha aıynda elde benzın satylymy ótken jyldyń osy aıymen salystyrǵanda 10,3%-ǵa (253 921 tonnaǵa deıin), al dızel otyny - 9,5%-ǵa (2 mln 46 myń 988 tonnaǵa deıin) qysqarǵan.
Jalpy munaı ónimderin satý kólemi 8%-ǵa tómendep, 2 mln 449 myń 71 tonna boldy.