Qazaqstan týrısteri úshin Tıan-Shan taýly aımaǵynda eki ótkel ashylady

NUR-SULTAN. QazAqparat – 1 shildeden bastap taý týrızmimen shuǵyldanatyn qazaqstandyqtar úshin Qyrǵyzstanmen shekaralas aımaqta 2 ótkel ashylady. Mundaı habarlama Mádenıet jáne sport mınıstrliginiń resmı saıtynda jarııalandy, dep habarlaıdy QazAqparat tilshisi.

Esterińizge sala keteıik, Prezıdent Qasym-Jomart Toqaevtyń 26 mamyrdaǵy Qyrǵyzstanǵa resmı sapary barysynda eki eldiń basshylary birlesken málimdemelerge qol qoıdy.

Sonyń biri - týrızm salasyndaǵy yntymaqtastyqty jandandyrý, ózara týrıstik aǵyndy ulǵaıtý týraly ýaǵdalastyq edi.

Osyǵan baılanysty Mádenıet jáne sport mınıstrligi týrıster qaýymdastyǵymen jáne «Atameken» kásipkerler palatasymen birlesip pılottyq joba ázirledi.

Qujat Qyrǵyz Respýblıkasy Jogorký Keneshiniń kóshi-qon komıtetimen kelisilgen.

«Atqarylǵan jumystyń nátıjesinde 1 shildeden bastap Tıan-Shan taýly aımaǵyndaǵy «Ozernyı» jáne «Sary bulaq» asýlary arqyly týrıstik toptardy ótkizý uıymdastyrylady», - delingen habarlamada.

Vedomstvo aqparatyna sáıkes, QR Syrtqy ister mınıstrligi 9 maýsymda eki ótkeldi ashýǵa qatysty Qyrǵyz Respýblıkasyna nota joldaǵan.

Qazirgi ýaqytta qazaqstandyq tarap kórshi memleketten jaýap kútip otyr.