Qazaqstan-Túrikmenstan arasyndaǵy áriptestik týraly shart ratıfıkatsııalandy

ASTANA. QazAqparat - Búgin QR Senatynyń jalpy otyrysynda «Qazaqstan men Túrikmenstan arasyndaǵy strategııalyq áriptestik týraly shartty ratıfıkatsııalaý týraly» QR Zańy qabyldandy, dep habarlaıdy QazAqparat.

«Qazaqstan Túrikmenstandy jaqyn kórshiles el jáne Ortalyq Azııadaǵy mańyzdy áriptes retinde qarastyrady. Shırek ǵasyr ishinde dıplomatııalyq qarym-qatynastarda  qos el arasynda ózara senim men qoldaýǵa negizdelgen eki jaqty yntymaqtastyqty damytý jolynda eleýli nátıjelerge qol jetkizildi. Strategııalyq shartqa qol qoıylǵanǵa deıin Qazaqstan-Túrikmen qarym-qatynastary Qazaqstan-Túrikmenstan arasyndaǵy dostyq qarym-qatynastary  men yntymaqtastyq týraly shartqa negizdelgen. Engiziletin sharttyń maqsaty ekijaqty qarym-qatynastardyń strategııalyq deńgeıin  jáne eki eldiń tyǵyz is-qımylyn bekitý bolyp sanalady», - dedi zań jobasy boıynsha baıandama jasaǵan QR Syrtqy ister mınıstri Qaırat Ábdirahmanov.

Onyń aıtýynsha, qujat joǵary jáne joǵary deńgeıdegi saıası dıalogty jetildirý jáne halyqaralyq uıymdar aıasyndaǵy yntymaqtastyqty damytýdy kózdeıdi. Shartqa sáıkes taraptar  halyqaralyq terrorızmge jáne dinı ekstremızmge, sondaı-aq jańa qaýipterge, syn-qaterlerge qarsy kúresti, osy joldaǵy yntymaqtastyqty keńeıtýdi ári tereńdetýdi kózdeıdi. Shartta saýda-ekonomıkalyq, mádenıe-ekonomıkalyq, áskerı jáne áskerı-tehnıkalyq, energetıka, aýyl sharýashylyǵy, kólik jáne basqa da salalardaǵy yntymaqtastyqty keńeıtý qarastyrady. Shartta eki memlekettiń tranzıttik-kóliktik áleýetin, halyqaralyq tranzıtti, telekommýnıkatsııalyq baǵyttardy damytýǵa aıryqsha nazar aýdarylǵan.

«Qujatta Aral teńiziniń ekologııalyq júıesin qalpyna keltirý, Kaspıı teńizi men transshekaralyq sý aǵymdarynyń qorǵalýy, osy saladaǵy halyqaralyq jáne óńirlik baǵdarlamalardy ázirleý jáne iske asyrý, shuǵyl kúsh-jiger biriktirý qarastyrylǵan. Atalǵan zań jobasy Qazaqstannyń barlyq múddeli memlekettik organdarymen kelisilgen», - dedi ol.

Mınıstrdiń aıtýynsha, eki el kelisimdi ratıfıkatsııalaý týraly gramotalarmen almasqannan keıin atalǵan zań jobasy kúshine enedi. Joba Qazaqstannyń zańdaryna ózgerister engizýdi talap etpeıdi. Sonymen qatar atalǵan zańdy qabyldaýǵa respýblıkalyq bıýdjetten qarjy shyǵyndalmaıdy.

«Osy zańdy qabyldaý Qazaqstan-Túrikmenstan  qarym-qatynastaryn odan ári nyǵaıtýǵa aıryqsha úles qosatynyna senimdimiz», - dep ata ótti Qaırat Ábdirahmanov.

Senatorlar qujatty biraýyzdan qoldap, Senattyń atalǵan zańdy qabyldaý týraly qaýlysy qabyldandy.