Qazaqstan turaqtylyqty saqtaýda OA elderi ishinde úzdik- germanııalyq sarapshy

ASTANA. QazAqparat - Ultaralyq jáne konfessııaaralyq kelisimdi saqtaý turǵysynda Qazaqstannyń tańdaǵan joly Ortalyq Azııada eń úzdik bolyp tabylady. Shyǵyseýropalyq jáne halyqaralyq zertteýler ortalyǵynyń (Germanııa) ǵylymı qyzmetkeri, doktor Beate Eshmentpen osylaı pikir bildirdi, dep habarlaıdy QazAqparat tilshisi.

Qazaqstan halqy Assambleıasynyń HHVІ sessııasy aıasynda ótkizilgen «Keń aýqymdy qazaqstandyq ulttyq biregeılik: syrtqy kózqaras» atty QHA ǵylymı-sarapshylyq keńesiniń otyrysynda Beate Eshmentpen Qazaqstandy 20 jyl boıy zerttep júrgenin aıtady.

«Qazaqstandaǵy ulttyq saıasatty, ulttyq azshylyqty zerttep júrgenime 20 jyldan astam ýaqyt ótti. Menińshe, qazaqstandyq jol - óte durys. Álemdegi árbir memleket úshin ortaq úıdiń bolýy asa mańyzdy. Minekeı, ortaq úı jaıly ıdeıa - óte tabysty ekenin ýaqyt kórsetip otyr. Menińshe, bul ıdeıa Qazaqstanda is júzinde júzege asyp otyr», - deıdi ol.

Sarapshynyń aıtýynsha, ortaq úı ıdeıasy qoǵamdaǵy turaqtylyqty saqtaýǵa septigin tıgizedi.

«Qazirgi tańda eń basty másele - ulttyq emes, ekonomıkalyq sıpatta ekeni aıqyn. Sebebi, eger adamdar tirlikten qınalsa, olardyń sanasynda birden: «Kim kináli?» degen suraq týyndaıdy. Barlyq jerde osylaı», - deıdi Beate Eshment.

Ol sonymen qatar, Ortalyq Azııadaǵy ózge memleketterden qaraǵanda Qazaqstandaǵy jaǵdaı biregeı ekenin, munda júzdegen ult ókilderi turyp jatqanyn atap ótti.

«QHA týraly aıtar bolsaq, Qyrǵyzstanda da mundaı ınstıtýt bar. Biraq, ol týraly eshkim eshteńe bilmeıdi. Assambleıa - bul óte sátti ıdeıa. Men senbi kúni ótetin sharany kórgim keledi. Buryn men QHA jumysy týraly tek oqyp júretin edim. Qazaqstan halqy Assambleıasynyń qoǵamdaǵy jaǵdaılarǵa shynaıy áser ete alatynyn eskersek, qazaqstandyq joldyń Ortalyq Azııada eń tabysty ekenine kózimiz jetedi», - deıdi Beate Eshment.