Qazaqstan transshekaralyq ózender sýyn paıdalanýdy retteıtin halyqaralyq konventsııaǵa qosyldy

<p>ASTANA. KAZINFORM &ndash; Sý resýrstary jáne ırrıgatsııa mınıstrligi transshekaralyq ózenderdiń sýyn birlesip paıdalaný máselesin Halyqaralyq sý aǵyndaryn keme qatynasynan basqasha paıdalaný túrleriniń quqyǵy týraly konventsııa aıasynda sheshýge nıetti. QR Parlamentiniń Senaty halyqaralyq konventsııany ratıfıkatsııalaý týraly Zańdy maquldady.</p>

Konventsııa transshekaralyq ózender men kólderdi jáne olarmen baılanysty jerasty sýlaryn ádil bólinýin qamtamasyz etetin jáne ony paıdalanýdy retteıtin halyqaralyq qujat bolyp tabylady. Qazirgi kezde 37 memleket Konventsııanyń qatysýshysy.

Halyqaralyq kelisim sý bólýge qatysty yqtımal daýlardy sheshý úshin jáne barlyq taraptyń múddesine saı sý resýrstaryn damytýǵa memleketter arasyndaǵy yntymaqtastyq tetikterin jasaıdy.

Konventsııaǵa sáıkes sý aǵyny memleketi óz aýmaǵynda halyqaralyq sý aǵynyn paıdalaný kezinde basqa memleketterge zııan keltirýmeý úshin tıisti is-sharalardy qabyldaıdy. Sondaı-aq sý aǵyny, sýdyń sapasy jáne tıisti boljamdar týraly qoljetimdi derektermen turaqty negizde bólisedi. Budan bólek, sý aǵyny memleketteri bir-birine keńes beredi, josparlanǵan is-sharalardyń halyqaralyq sý aǵynyna áseri týraly kelissóz júrgizedi.

«Máselen, Konventsııada gıdrotehnıkalyq qurylystar salý is-qımyly boıynsha naqty sharalar aıqyndalǵan. Atap aıtqanda, múddeli taraptardyń kelisiminsiz júzege asyrýǵa sanktsııa bermeıdi dep jazylǵan. Osy turǵyda, kórshi memlekettermen yntymaqtastyq sheńberinde sý sharýashylyǵy is-sharalaryn kelisip atqarý qamtamasyz etiletin bolady. Budan bólek, mınıstrlik transshekaralyq ózenderdiń sýyn birlesip paıdalaný máselesin memleketaralyq sý sharýashylyǵy komıssııasy arqyly da sheshetin bolady», - dedi QR Sý resýrstary jáne ırrıgatsııa birinshi vıtse-mınıstri Bolat Beknııaz.