Qazaqstan Transkaspıı baǵyty boıynsha júk tasymaldaýdy jandandyrýda

BAKÝ. QazAqparat - Grýzııa, Ázerbaıjan, Túrkııa jáne Qazaqstan arasyndaǵy Middle Corridor birlesken kásiporny ázirlený ústinde. Ol 2023 jyldyń basynda nemese ortasynda resmı túrde daıyn bolýy múmkin, dep habarlaıdy QazAqparat RailFreight.com-ǵa silteme jasap.

Bul týraly Transkaspıı halyqaralyq kólik joly qaýymdastyǵynyń (THKQ) bas hatshysy Gaıdar Ábdikárimov málimdedi.

«Birlesken kásiporyn resmı túrde qurylýda, biraq kem degende jyldyń sońyna deıin kútýimiz kerek. Kompanııa 2023 jyldyń basynda-ortasynda resmı túrde jumys isteı bastaıdy», - dedi THKQ bas hatshysy. Onyń aıtýynsha, mundaı birlesken kásiporyn júk tıeý protsesterin jeńildetip, túrli elder men joldar arqyly ótýdi birqalypty etetin Orta dáliz (Middle Corridor) qundylyǵyn arttyrady.

Buǵan deıin, 31 naýryzda tórt memleket – Grýzııa, Ázerbaıjan, Túrkııa jáne Qazaqstan dáliz boıynda ornalasqan elderdiń yntymaqtastyqty nyǵaıtýǵa jáne tranzıttik áleýetin arttyrýǵa baǵyttalǵan Transkaspıı halyqaralyq kólik dálizin damytý týraly tórtjaqty málimdemege qol qoıǵan bolatyn.

Málimdemede baǵdar boıyndaǵy elder arasynda yntymaqtastyq pen Transkaspıı kólik dálizin halyqaralyq kólik júıesine biriktirý úshin ınfraqurylymdy damytýǵa ınvestıtsııa quıý mańyzdylyǵy atap ótilgen.

Basym baǵyttardyń biri – Baký-Tbılısı-Kars (BTK) temirjol jelisiniń eýrazııalyq tasymaldardaǵy básekelestik artyqshylyǵyn arttyrý jáne osy joldyń ótkizý qabiletin jetildirý jumystaryn júzege asyrýdy jedeldetý.

Eske sala keteıik, Úkimet otyrysy barysynda QR Premer-Mınıstri Álıhan Smaıylov Eýropaǵa balamaly baǵyttar boıynsha tasymaldaýdyń turaqtylyǵyn qamtamasyz etýdi tapsyrǵan.